A alcaldesa de Marín lanza unha mensaxe de ánimo e concienciación á cidadanía marinense

Despois de varios días de confinamento, segue sendo necesario que toda a cidadanía se involucre no cumprimento estrito das medidas enmarcadas no decreto do estado de alarma. A gran maioría da veciñanza de Marín está mostrando a súa solidariedade, o seu compromiso e a súa vontade de colaboración, aportando o seu grao de area nesta loita colectiva contra o coronavirus.

Pero tamén existen algunhas persoas que incumpren as regras e deben ser apercibidas pola Policía Local, que esta mesma mañá tivo que tramitar outras tres novas denuncias por ocupación indebida da vía pública, sen unha xustificación para o desprazamento.

Ante esta situación, a alcaldesa, María Ramallo, gravou un vídeo dirixido a toda a cidadanía de Marín, coa fin de transmitir unha mensaxe de ánimo e de concienciación. “Sei que despois de varios días, o confinamento pode resultar pesado, pero é a mellor maneira que temos de poder axudar a todas aquelas persoas que quererían estar no seu fogar pero non poden porque están axudándonos a todos e todas. Non nos podemos relaxar”, advirte a rexedora.

Por outra banda, Ramallo insistiu de novo no inexistente risco de desabastecemento de bens de primeira necesidade e volveu instar á veciñanza a facer compras racionais e cumprindo nestes espazos con todas as medidas de prevención e hixiene, tanto entre usuarios como cos traballadores e as traballadoras dos establecementos de alimentación.

Por outra banda, salientar que continúan a levarse a cabo os traballos de limpeza e desinfección das principais rúas do centro urbano de Marín.

#MarínEnCasa, unha iniciativa para tender pontes

Nestes días, as redes sociais e, en xeral, as novas tecnoloxías, están axudando a manter o contacto social que non podemos ter de maneira presencial. Isto permite que sigamos en contacto cos nosos seres queridos, os nosos amigos e os nosos veciños. Seguindo esta filosofía, a Policía Local de Marín puxo en marcha onte a iniciativa #MarínEnCasa, unha actividade que consiste en que todos aqueles que queiran participar poderán enviar unha fotografía ao enderezo policiamarinencasa@gmail.com, na que se vexan as diversas formas nas que están a ocupar este tempo.

Estas fotografías serán subidas pola propia Policía a un post da súa conta de Facebook. Aquela persoa que colleite máis “gústame” coa súa instantánea, recibirá, ao finalizar o decreto do estado de alarma, un detalle de agradecemento por parte da Policía Local pola súa participación na iniciativa.

Para participar, será obrigatorio ser seguidor e darlle a “Gústame” á páxina de Facebook da Policía Local de Marín.

O servizo de atención a domicilio para persoas dependentes, funcionando e extremando as medidas de hixiene

Noutra orde de cousas, o Concello informou esta mañá de que todos os usuarios do servizo de axuda a domicilio seguen recibindo todas as atencións e coidados necesarios, cumprindo sempre cas medidas de hixiene, extremándoas nestes casos por tratarse de persoas maiores, que conforman o grupo de risco máis importante.

Tamén os servizos das organizacións sen ánimo de lucro, como é o caso do Comedor Social, seguen en marcha.

Deja una respuesta

Tu dirección de correo electrónico no será publicada. Los campos obligatorios están marcados con *

Este sitio usa Akismet para reducir el spam. Aprende cómo se procesan los datos de tus comentarios.