CIG. Inditex solicitará un ERTE se o estado de alarma persiste a pesar dos seus enormes beneficios

A CIG-Servizos considera inadmisible que unha multinacional como Inditex, que obtén miles de millóns de euros de beneficios anuais a nivel mundial poña sobre a mesa a posibilidade de aplicar un ERTE, a partir do 15 de abril, se o estado de alarma persiste. Así o denuncia a secretaria de Acción sindical e presidenta do comité de empresa de Zara da provincia da Coruña, Carmiña Naveiro, para que “é indignante o continuo lavado de cara que os poderes públicos lle fan a esta empresa”.

Naveiro sinala que o ERTE atinxiría a todo o persoal de tendas de todo o Estado, unhas 25.000 traballadoras e traballadores, ao quedar excluído, segundo as últimas informacións, o persoal de Loxística, fábricas e servizos centrais.

Considera, en todo caso, “sangrante” que unha empresa como Inditex anuncie a un tempo que vai aplicar un ERTE, de continua a situación, e que, “ese mesmo día, anuncie en todos os medios de comunicación que obtivo uns beneficios de 3.639 millóns de euros entre o 1 de febreiro de 2019 e o 31 de xaneiro de 2020”, o que supón “un incremento do 8% dos beneficios de todo o Grupo Inditex”.

A presidenta do comité de Zara da provincia da Coruña subliña que “só unha parte deste incremento de beneficios permitiría a esta multinacional sufragar os gasto de persoal mentres dure a actual situación de alarma”.

Doazón de máscaras e batas

Carmiña Naveiro valora positivamente o anuncio de Inditex de que vai doar máscas e batas porque “nesta situación toda a xuda é necesaria”, mais, por outra banda, considera “sorprendente” que esta empresa “pretenda que o 70% dos noso salarios sexan sufragados polos impostos de todas e todos os cidadáns, incluídos os das propias traballadoras”.

Naveiro apunta ademais que de se aplicar o ERTE a partir do día 15 de abril, “Inditex nin sequera aclarou se manterá o 100% dos salarios, completando ela, ou non”. Sinala ademais que “as traballadoras das tendas estamos fartas de ser as últimas en ter información cando nos vai afectar directamente”, porque “a dirección da transnacional eludiu calquera contacto coa representación sindical na empresa”, denuncia.

Para a presidenta do comité de Zara da Coruña esta situación é indignante porque “nunca se ten en conta o traballo das persoas empregadas nas tendas e xa vai sendo hora de que se valore unha parte tan importante da empresa, como somos as que vendemos a produción”. Por iso rexeita que “teñamos que sabelo pola prensa”.

Para a representante de CIG-Servizos “tiña que caerlle a cara de vergonza a toda a dirección de Inditex, só por pensar en presentar un ERTE, non xa polos beneficios deste ano, senón por todos os acumulados en anos anteriores, que foron os que permitiron situar a Amancio Ortega como un dos maiores multimillonarios no planeta”.

Por iso reitera que “estamos fartas da dobre cara de Inditex”. Unha empresa que, di “lava a súa imaxe coas doazóns -que por outra banda desgravan en facenda- e porén que non invista nos nosos dereitos e condicións laborais nas tendas, porque non lle supón ningún beneficio de cara ao público”.

A pesar de todo isto agarda que recapacite e que se faga cargo dos salarios do 100% do seu persoal sen recorre ás arcas públicas para seguir mantendo o seu monto de beneficios.

Comparte:

Deja una respuesta

Tu dirección de correo electrónico no será publicada. Los campos obligatorios están marcados con *

ocho − seis =

Este sitio usa Akismet para reducir el spam. Aprende cómo se procesan los datos de tus comentarios.