Marín fai un balance “moi positivo e sen incidentes” das noites de San Xoán e San Pedro

Non se deron incidentes importantes en ningún dos dous casos e a veciñanza que acudiu ás fogueiras cumpriu coas medidas de prevención e hixiene  esixidas dentro do decreto de nova normalidade que actualmente está en vigor na nosa comunidade autónoma

O Concello de Marín quixo realizar esta mañá un balance positivo das noites de San Xoán e da de San Pedro, que tivo lugar onte, e nas que se permitiu a celebración e a conmemoración da tradición popular de acender fogueiras.

No caso de San Xoán, a noite por excelencia desta costume, o comportamento e o cumprimento das normas esixidas foi “óptimo”. “Estamos moi satisfeitos e orgullosos da boa resposta que tivemos por parte da veciñanza”, aseguran fontes municipais, xa que todas as persoas que acudiron ás fogueiras públicas autorizadas cumpriron cos requisitos de seguridade e de prevención fronte ao coronavirus incluídos no decreto da nova normalidade.

A propia Policía Local aseguraba nun comunicado que o transcurso da noite “foi normal e houbo moi bo comportamento” por parte da cidadanía, grazas ás afluencias controladas a través dos aforos, especialmente na fogueira máis grande que se fixo, que foi a de Cantodarea.

O Concello quere agradecer aos organizadores desta fogueira, Amijos e Vesiños de Cantodarea, a súa implicación e o seu esforzo para que este balance sexa tan positivo e para que Marín non quedase sen celebrar o seu San Xoán, pero sempre dun xeito controlado e seguro.

En total, en San Xoán autorizáronse 6 fogueiras públicas e 98 privadas e aproximadamente unha ducia de locais de hostalaría asaron comida nos exteriores dos seus establecementos. Por outra banda, na noite de San Pedro autorizáronse 28 solicitudes para fogueiras privadas.

Deja una respuesta

Tu dirección de correo electrónico no será publicada. Los campos obligatorios están marcados con *

5 × cinco =

Este sitio usa Akismet para reducir el spam. Aprende cómo se procesan los datos de tus comentarios.