Pancho Casal: «O maltrato da Xunta á xente que nos coida é intolerable»

  O candidato á presidencia da Xunta pola Marea Galeguista, Pancho Casal, e a candidata pola provincia da Coruña, Luz Marcos Buján, reuníronse este martes en Santiago co Comité Intercentros do Persoal Laboral, que lamentou a situación de desemparo na que se encontra, en especial, durante a pandemia pola Covid-19. “Grazas á alta profesionalidade e ao esforzo das traballadoras, a entrada da Covid nas residencias e nos centros limitouse moito”, sinalaron desde o comité.

Entre os principais problemas, o comité sinalou a situación de abuso por parte da administración: “O 54% do persoal atópase en situación de temporalidade. Existe unha total irregularidade no referido aos horarios. Elimináronse as 48 horas de descanso obrigatorio por semana. No traballo en festivos, retirouse o incremento de descanso. Isto levou a unha situación de saturación tal que a xente chegou a pedir baixas non remuneradas”.
Pancho Casal, incidiu nos recortes que este grupo sofre desde o 2009, sendo os últimos en recuperar a paga extraordinaria. “Son os máis damnificados polos recortes da Xunta de Galicia. Desde a Marea Galeguista apostamos porque todos os centros de servizos sociais sexan públicos e por iso consideramos que unha parte importante dos fondos de reconstrución teñen que ir aos servizos socais”, salientou o candidato.

Tamén denunciaron as traballadoras a ausencia total de convocatorias de emprego público e que están nunha situación de desigualdade cos funcionarios, cando realizan o mesmo traballo. Puxeron de manifesto a imposiblidade de prestar o servizo en condicións óptimas debido aos recortes, “como pasa cos residentes con patoloxías psiquiátricas, que cada vez son máis, por non ter onde atendelos”.
“Desde a Marea Galeguista -afirmou Casal- cremos que é fundamental, para empezar a atallar esta situación, a recuperación dos dereitos que a Xunta de Galicia suprimiu unilateralmente, no ano 2012, ao eliminar toda unha serie de prazas de persoal de diversas categorías”.

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.