Concello da Coruña e Repsol colaboran na formación de persoal para emerxencias

A alcaldesa, Inés Rey, e o director da refinería, Javier Sancho, visitaron esta mañá o parque de bombeiros de Agrela

A alcaldesa, Inés Rey, e o director da refinería de Repsol, Javier Sancho visitaron esta mañá o parque de Bombeiros de Agrela xunto ao director da área de Seguridade Cidadá, Carlos García Touriñán, e o subdirector de Seguridade, Medio Ambiente e Calidade da refinería, José Antonio Cámara. A visita serviu para renovar o convenio de colaboración en materia de seguridade que ambas as entidades manteñen desde hai 29 anos co obxectivo de mellorar a preparación e a colaboración en actuacións de emerxencia. Este ano, como novidade, Repsol contribúe ao desenvolvemento do plan de formación específico para o persoal de Emerxencias do Concello da Coruña que permitirá incrementar a preparación en emerxencias, algo que beneficiará a toda a cidadanía e mellorará a seguridade.

A alcaldesa afirmou que este plan de formación, froito da colaboración entre as dúas entidades, “é o primeiro paso na especialización e mellora na formación dos bombeiros da cidade”. Pola súa parte, o director da refinería, Javier Sancho, sinalou que o convenio demostra unha vez máis que un dos principais compromisos de Repsol coa súa contorna é a seguridade das persoas e instalacións.

A refinería conta cunha das dotacións de equipos e material de seguridade máis amplas en instalacións industriais de toda Europa e, pola súa banda, o parque de bombeiros integrado no Servizo de Extinción de Incendios e Salvamento (SEIS) dispón de 100 persoas profesionais especializadas en actuacións de emerxencia e salvamento e conta cos medios idóneos para facer fronte ás situacións deste tipo que poidan producirse dentro do municipio.

O convenio inclúe a realización conxunta de exercicios de carácter formativo para mellorar a eficacia en caso de intervención, afianzando a colaboración entre os equipos humanos; o coñecemento dos medios materiais dispoñibles e o intercambio de información sobre novos medios e técnicas especializadas, que se foron incorporando por ambas as partes.

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.