Investigadores da UDC desenvolven con financiamento do Fondo Supera Covid-19 unha ferramenta para monitorizar e predicir a evolución da pandemia

Un proxecto liderado pola Universidade da Coruña logrou a concesión de 62.000 euros do Fondo Supera COVID-19 para o desenvolvemento dunha ferramenta web que, ao tempo que monitoriza a evolución da pandemia, proporciona predicións baseadas en diferentes modelos de predición combinada.

A convocatoria, posta en marcha polo Banco Santander en colaboración co Consello Superior de Investigacións Científicas (CSIC) e Crue Universidades Españolas e dotada con 8,6 millóns de euros, está dirixida a financiar programas, proxectos colaborativos e medidas de apoio ao ámbito universitario para minimizar o impacto da crise provocada polo coronavirus nos ámbitos sanitario, educativo e social.

O proxecto Cooperative Forecasting (ForeCoop) xurdiu no marco do programa “Matemáticas contra o coronavirus”, unha iniciativa do Comité Español de Matemáticas (CEMat) para poñer ao dispor das autoridades as capacidades de matemáticos e estatísticos en aras de contribuír a entender e combater a pandemia por COVID-19. Os profesores da Facultade de Informática da UDC José Antonio Vilar e Ricardo Cao lideran o proxecto.

O obxectivo principal de ForeCoop é desenvolver unha ferramenta web para monitorizar e predicir a evolución da pandemia a través de series de datos de interese como contaxios, falecementos, hospitalizados, ingresos en UCI, etc.

Unha característica diferencial do proxecto é que as predicións son en realidade metapredicións obtidas combinando predicións provenientes de diferentes modelos matemáticos e epidemiolóxicos que, diariamente e de maneira independente, subministran ao proxecto un amplo número de grupos de investigación de toda España. Esta estratexia de combinar predicións é moi adecuada para xerar predicións estables e precisas, particularmente en situacións de alta incerteza como é o caso a pandemia por COVID-19.

Existe xa unha versión beta da ferramenta, accesible en https://covid19.citic.udc.es, que xa veu xerando predicións ata o 21 de maio, data na que o Instituto de Salud Carlos III deixou de publicar os datos das variables estudadas, pero pronto se espera poder retomar a súa actividade. É importante destacar que máis de 60 grupos de investigación inscribíronse nesta etapa, 45 dos cales enviaron xa predicións facendo viable o proxecto e dando unha idea do interese que o proxecto espertou.

ForeCoop xira ao redor de cinco eixos prioritarios de desenvolvemento: contribuír a mellorar a calidade das series de datos provistas polos gobernos autonómicos; desenvolver software para automatizar o proceso de adquisición de datos e integrar as predicións individuais; implementar novos algoritmos de predición cooperativa e avaliar a súa conduta; mellorar as funcionalidades da web interactiva; e dotar de versatilidade e robustez á ferramenta para facela facilmente adaptable a outras variables e a outros países ou contornas.

O proxecto, que conta coa participación de investigadores do Centro de Investigación en Tecnoloxías da Información e das Comunicacións (CITIC) da Universidade da Coruña, así como investigadores da Universidade de Valladolid e da Monash University de Melbourne (Australia), desenvólvese no ámbito do Campus Innova e remarca un dos eixos deste campus de especialización: a importancia da ciencia e a enxeñería de datos ao servizo da sociedade.

A imaxe reflicte a evolución da variable “novos casos” para unha comunidade autónoma fronte ás predicións cooperativas (metapredicións) sinaladas co segmento azul.

Deja una respuesta

Tu dirección de correo electrónico no será publicada. Los campos obligatorios están marcados con *

Este sitio usa Akismet para reducir el spam. Aprende cómo se procesan los datos de tus comentarios.