Aprendendo baixo paus

Ata fai pouco, o posto de porteiro era algo prácticamente esquecido nos clubes de fútbol modesto, rara vez contaban con adestramento específico e, moito menos, con alguén adicado a esa tarefa en exclusiva. Quizais por iso, dous porteiros avalados polas súas traxectorias e os seus títulos formativos, convertíronse en pioneiros na bisbarra adicándose á ensinanza dese ingrato posto onde a gloria e a derrota, sempre están separadas por unha finísima liña.

Óscar Rama (Trucho) e Agustín de Carlos (Elduayen), fixeron da portería un posto apetecible dende a súa itinerante Escola de Porteiros Nordés, que comezou en Carballo e Baio, e que nunca deixou de contar cun amplo número de alumnos apaixonados dos tres paus. Abarcando todas as categorías, as quendas van dende Prebenxamín a Sénior, e algúns rapaces levan transitada toda a súa vida deportiva da man deles. Os segredos da área pequena son descubertos pola profesionalidade e coñecementos de Trucho e Elduayen, moito máis que mestres, tamén cómplices e depositarios das alegrías e penas que conleva o posto, unha responsabilidade que os nenos e nenas van adquirindo dende cativos baixo a súa tutela. Unha forma tamén de relacionarse con compañeiros doutros equipos, rivais en competición pero amigos no campo Nordés.
Cada vez máis, un porteiro non é só alguén que xogue coas mans, cualidades coma o xogo de pés, aéreo, intelixencia á hora de tomar decisións en segundos ou algo que parece tan sinxelo coma colocar ben unha barreira, son aspectos que se traballan ao detalle, tratando de que cada un deses alumnos sexa cada día máis completo e seguro.
Abonda ver calquera dos seus adestramentos para vivir a aprendizaxe coma un divertimento, para sacar partido do mellor  deles mentres desfrutan do fútbol e dun verde onde non se cantan goles, senón que se paran. A Escola de Porteiros Nordés xa comeza a traballar tratando de que se poida abrir de novo as portas canto antes, aínda sen data concreta, pero con toda a ilusión posta en seguir vendo medrar aos que despois serán os heroes de cada domingo, os que aprenderon a caer pero tamén a erguerse, a recoller o balón do fondo da rede pero, sobre todo, a impedir por todos os medios que entre nela. O futuro xa está aquí…é de todos os que se namoran dos tres paus ao calor da Nordés.

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.