Melloras en Palas de Rei para a estrada que une Devesa de Rei co núcleo de Xende

A Xunta de Goberno aprobou este venres a licitación destes traballos, cos que se acondicionarán os primeiros 10 quilómetros da vía

A Xunta de Goberno da Deputación de Lugo aprobou este venres a licitación das obras de mellora da estrada provincial LU-P-4004 no concello de Palas de Rei, que conecta os núcleos de Devesa de Rei, Ribeira e Xende. Así informou a voceira socialista do Goberno, Pilar García Porto, en rolda de prensa onde explicou que o orzamento para estes traballos é de 83.063€.

A Deputada detallou que se van arranxar 10 quilómetros de vía: dende o punto quilométrico 0 ata o 10,045. “O proxecto  contempla realizar un saneo da explanada e do firme granular que presenta blandóns e ondulacións, mediante o corte do pavimento existente. Vaise escavar 80 centímetros de profundidade e realizarase un recheo con 40 centímetros de zahorra artificial e macadam ordinario”, expuxo.

“Todas as fochancas e defectos similares que presenta esta vía quedarán arranxados e despois, aplicaranse varios regos asfálticos nos 10 quilómetros”, explicou a voceira socialista do Goberno.  O prazo de execución do conxunto destes traballos é de 2 meses.

García Porto incidiu na importancia que ten para a Deputación de Lugo o mantemento e a mellora das estradas provinciais. “Consideramos que a mobilidade é un dereito da cidadanía que contribúe ao equilibro social e territorial. Como se pode comprobar, en practicamente todas as Xuntas de Goberno aprobamos licitacións ou adxudicacións de obras na Rede Viaria Provincial”. Ademais, deu un dato: a día de hoxe a institución provincial ten en marcha obras en estradas de toda a provincia por máis de 4,6 millóns de euros. “Unha cantidade que contribúe a dinamizar a economía das empresas e axuda a garantir postos de traballo”, explicou.

Deja una respuesta

Tu dirección de correo electrónico no será publicada. Los campos obligatorios están marcados con *

Este sitio usa Akismet para reducir el spam. Aprende cómo se procesan los datos de tus comentarios.