Arias afirma que “os máis de dous anos de parálise demostran que o Goberno central non ten intención real de avanzar na nova comisaría de Lugo”

O delegado territorial explica que non se pode sacrificar unha residencia de maiores “que estará entre as mellores de Europa” por un posible proxecto sen visos de materializarse

O delegado territorial da Xunta en Lugo, Javier Arias, considera sorprendente que a subdelegada do goberno se interese agora pola posible construción da nova comisaría na cidade logo de “máis de dous anos de parálise, nos que só atopamos reticencia a impulsar calquera avance por parte do Goberno central”.

Arias instou á subdelegada a aclarar diante da cidadanía e dos propios axentes da Policía Nacional “cales foron os pasos dados polo Ministerio de Interior para que a nova comisaría fora unha realidade”, porque ata o día de hoxe “demostraron nulo interese e ningunha vontade de levar a cabo esta obra”.

O delegado explicou que “non podemos seguir agardando sine die polo Goberno do Estado, resulta imposible dispoñer da nova comisaría nun prazo de tempo razoable e non podemos sacrificar tamén o proxecto da residencia de maiores que propón a Fundación Amancio Ortega”.

Neste sentido, Arias lembrou que a Fundación segue un modelo para este tipo de edificacións que limita a altura a dúas plantas por cuestións de accesibilidade e funcionalidade, o que se compensa con amplos espazos en horizontal ademais de zonas axardinadas no exterior. “Non podemos renunciar a ter un centro de maiores que estará á altura dos mellores de Europa por unha suposta comisaría que non acaba de ter visos de materializarse”.

En todo caso, engadiu, “cando o Goberno central amose unha intención real de acometer a obra, a Xunta estará á súa disposición para colaborar en canto sexa preciso para que a cidade dispoña desta infraestrutura”. Ata o momento, concluíu, “levamos sempre a iniciativa na recuperación do barrio da Residencia, pero a comisaría é competencia do Estado e en ningún momento demostraron a máis mínima implicación”.

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.