As zonas verdes serán as protagonistas no proxecto das Percebeiras

Das 371 vivendas que se construirán, 148 serán de protección oficial

O proxecto urbanístico das Percebeiras reservará un espazo de 22.827 metros cadrados dos 43.941 totais a zonas verdes e de lecer para a cidadanía, unha extensión que equivalerá a dous parques Europa e que suporá a metade da superficie do Plan especial de Labañou PE M18. Villoslada sinalou que ofrecerá unha nova fachada, onde a cidade mirará ao mar dun xeito máis amable e harmónico, despois de que se reducise o número de vivendas. Finalmente serán 371, distribuídas en doce bloques situados entre o Paseo Marítimo e a avenida de Labañou, das que un 40%, en concreto, 148 pisos, serán de protección oficial. Así o confirmou hoxe na celebración do Pleno, onde defendeu que tres cuartas partes do proxecto serán de uso público entre as zonas verdes, viarios e equipamentos para a veciñanza. O edil manifestou a intención do Goberno local de promover ata 1.400 vivendas de protección oficial situadas en ámbitos consolidados.

Por outra parte, o conxunto urbanístico permitirá a conexión coas vivendas de María Pita e o centro Padre Rubinos a través dun viario que ordenará o perímetro e facilitará o fluxo de tráfico. Ademais, os bloques terán baixos comerciais para lles daren servizo ás persoas residentes nesa idea de non illar Labañou e promover a vida no barrio que se reforzará coa creación de equipamentos e espazos públicos. Desta forma, tratarase de impulsar o pequeno comercio e as relacións cidadás. O plan incluirá tamén un aparcadoiro público cun total de 358 prazas co obxectivo de responder a unha demanda das e dos veciños sobre a dificultade á hora de atopar sitio onde aparcaren os seus vehículos.

O concelleiro de Urbanismo recordou no Pleno que o plan se atopa aínda no inicio do trámite ambiental coa Xunta de Galicia e que, en todo caso, pasou por diferentes etapas, “etapas en que todos os partidos políticos que estamos aquí tivemos ocasión de gobernar ou cogobernar”. O edil dirixiuse a Marea Atlántica para lle cuestionar por que non modificou o proxecto ante estas “soflamas urbanísticas” que proclamou na sesión plenaria e lembrou que tampouco lle consta ningunha modificación do planeamento para levar adiante actuacións de protección do bordo litoral como a que se está a iniciar neste mandato fronte á ría do Burgo.

Deja una respuesta

Tu dirección de correo electrónico no será publicada. Los campos obligatorios están marcados con *

Este sitio usa Akismet para reducir el spam. Aprende cómo se procesan los datos de tus comentarios.