Remata a execución da senda peonil e ciclista da estrada LU-633 en Portomarín

O delegado territorial de Lugo, Javier Arias, comprobou o resultado das obras, que permitiron crear un itinerario seguro para os peregrinos que percorren ese treito do Camiño Francés e para os peóns en xeral

A Consellería de Infraestruturas e Mobilidade finalizou esta semana a construción da senda peonil e ciclista da estrada LU-633 en Portomarín, nun treito de 260 metros que coincide co percorrido do Camiño Francés.

O delegado territorial da Xunta, Javier Arias, comprobou hoxe o resultado dos traballos, aos que a Administración galega destinou 284.500 euros. Na visita estivo acompañado por persoal técnico da Axencia Galega de Infraestruturas (AXI) e polo alcalde de Portomarín, Juan Serrano, entre outras persoas.

As obras executáronse nos últimos meses co obxecto de construír un itinerario seguro para os viandantes desde a baixada do Camiño -fronte ao albergue situado a esa altura da LU-633– ata a entrada da ponte de acceso á vila de Portomarín (entre os puntos quilométricos 72,320 e 72,580 da estrada). A senda está finalizada e estes días estanse a facer os últimos remates, en concreto estase a completar a colocación dunha varanda.

“Con esta actuación acádase un itinerario máis seguro para os milleiros de peregrinos que percorren a ruta xacobea e para os peóns en xeral”, salientou Arias. Ao mesmo tempo, engadiu, apóstase por fomentar “un tipo de mobilidade máis saudable e sustentable, cun proxecto que atende a criterios de integración paisaxística”.

Características da senda

A senda deseñouse pola marxe esquerda para permitir que sexa continua, sen que haxa que cruzar a estrada. No inicio localízanse as escadas de baixada do Camiño Francés na beira dereita, polo que nesa parte complementouse cun pequeno treito de senda a ese lado da vía e un paso de peóns.

Para acometer as obras foi preciso executar pequenos desmontes e corrixir terrapléns. Nunha parte incorporouse unha estrutura en voadizo con varanda para dispor dun ancho adicional.

A obra permitiu ampliar a sección da calzada para poder albergar os elementos da nova plataforma, co fin de reforzar a seguridade das persoas que se desprazan a pé, evitando que teñan que circular pola beiravía.

Deja una respuesta

Tu dirección de correo electrónico no será publicada. Los campos obligatorios están marcados con *

Este sitio usa Akismet para reducir el spam. Aprende cómo se procesan los datos de tus comentarios.