O Grupo Socialista critica que a nova Lei de Residuos e Solos Contaminados de Galicia “non se adapte aos novos tempos nin as esixencias ambientais”

Paloma Castro lamenta que “Galicia quede atrás” ao non incluír no texto “a perspectiva de loita contra o cambio climático”, “deixar fóra o regulamento dos plásticos” e non ter en conta a normativa europea

A vicevoceira do Grupo Socialista, Paloma Castro, vén de criticar que a nova Lei de Residuos e Solos Contaminados de Galicia “non se adapte aos novos tempos nin as novas esixencias medioambientais”. Fíxoo, hoxe, no Pleno do Parlamento, durante o debate e votación do ditame do proxecto de lei, aprobado cos votos a favor do PP e cos votos en contra de PSdeG e BNG.

“Esta lei responde a unha unilateralidade total, unha falla total de flexibilidade e de esforzo cara a acadar un consenso e incorporar outros puntos de vista”, aseverou a socialista, quen amosou a súa sorpresa porque o texto non inclúa “a perspectiva de loita contra o cambio climático”, “deixe fóra a regulación dos plásticos” e non teña en conta a normativa europea, o que é “incomprensible”.

Castro lamentou que co texto se perda “unha gran oportunidade para mellorar a xestión de residuos, clarificar competencias e responsabilidades e facelo en coherencia coas estratexias contra o cambio climático, cunha próxima regulación estatal e coa actual normativa europea”. Así, subliñou que “con este texto, Galicia queda atrás”.

“Apróbase hoxe unha lei que é moi necesaria, pero non só chega tarde, senón que chega desactualizada. Apróbase unha lei redactada no ano 2018, pero estamos no 2021”, sentenciou Castro. Así, Castro criticou a falla de regulación específica acorde as “novas circunstancias nas que nos atopamos”, derivadas da pandemia da covid.

Nesta liña, a responsable socialista incidiu en que “a loita contra a pandemia provocou tamén o aumento de determinados tipos de residuos, en concreto, plásticos dun só uso, como luvas cobrebocas ou pantallas de protección”, o que supón “un grave problema de contaminación porque moitos deles non son reciclables”.

Doutra banda, censurou no texto a falla de coordinación interadministrativa e de mecanismos para acadar unha financiación suficiente que posibilite aos concellos a participación nos plans autonómicos. Ademais, criticou a “insuficiente regulación dos bioresiduos” e a “falla de perspectiva do emprego”, xa que na política de xestión de residuos, prevención ou reciclaxe “existe unha enorme oportunidade de crear emprego”.

A responsable socialista propuxo “un novo enfoque cara un sistema máis descentralizado” cunha “xestión rexida polos principios de autosuficiencia e proximidade” que, ademais de “ser ambientalmente máis sostible, tamén aforra custes de transporte e xera emprego”. Isto permitiría, subliñou, apostar “por un modelo de xestión diferente ao modelo de concentración actual o modelo Sogama, que segue a manter esta lei”.

Deja una respuesta

Tu dirección de correo electrónico no será publicada. Los campos obligatorios están marcados con *

Este sitio usa Akismet para reducir el spam. Aprende cómo se procesan los datos de tus comentarios.