A Deputación da Coruña e Arteixo cofinancian a mellora de camiños rurais e do sistema de abastecemento en Pastoriza

A Deputación achega a través do Plan Único o 60% do orzamento de ambas actuacións, que supoñen unha importante mellora das infraestruturas básicas do municipio

A Deputación da Coruña e o Concello de Arteixo unen forzas para desenvolver proxectos de mellora da seguridade viaria nas parroquias de Barrañán e Armentón e para renovar o sistema de abastecemento do municipio na contorna de Pastoriza. O Plan Único do ente provincial financia o 60% do custo total das actuacións, 447.142 euros, que se atopan en fase de licitación.

O Concello inclúe dentro dos seus proxectos para renovar infraestruturas básicasa mellora de varios camiños nas parroquias de Barrañán e Armentón. Os traballos levaranse a cabo nas estradasCM-00050, CM-00042, CM-00306, CM-00346, CM-00312, CM-00313.1, CM-00313.2 e CM-00333 que conectan con vías de comunicación principais no municipio, como poden ser a A-6, AG-55, AC-552, AC-551, AC-415,AC-15 ou estradas provinciais.

Co fin de mellorar estas rutas en mal estado, desenvolveranse tarefas de reparación de fochancas, limpeza de cunetas, pavimentación, sinalización e drenaxe. Estímase que o prazo de execución das obras será de 3 meses e as empresas interesadas poderán presentar ofertas ata o 13 de abril de 2021. A Deputación achega para esta actuación un total de 110.012 euros a través do Plan Único, sendo o custo total desta de 227.336 euros. O orzamento restante é aportado polo propio Concello.

Renovación da impulsión do depósito de auga de Pastoriza

Por outra banda, tamén está prevista a renovación completa da impulsión de auga desde o bombeo de Sobrado ao depósito de Pastoriza. Ao longo da súa vida, esta impulsión sufriu numerosas roturas, poñendo en risco a subministración de auga de todo o concello.

Para eliminar este perigo, substituirase a tubaxe de fibrocemento existente por unha nova de fundición dúctil, que permitirá que a canalización sexa máis elástica. As tarefas levaranse a cabo entre o paso superior da estrada de acceso ao porto exterior ata o inicio das escaleiras que dan acceso á escultura da virxe de Pastoriza.

Co obxectivo de seguir mantendo o servizo actual mentres se realizan as obras, que contan cun prazo de execución de 3 meses e ás que poderán presentarse ofertas ata o 14 de abril de 2021, colocarase a tubaxe na marxe oposta da vía á da condución existente, é dicir, pola marxe dereita sentido Pastoriza. Esta cambiará á marxe esquerda á altura do campo de fútbol.

A nova canalización conectará coa rede existente ao inicio e ao fin do tramo executado. Unha vez finalicen as obras reporase o firme da calzada. As actuacións contan cun orzamento total de 219.806 euros, dos que a Deputación achega 154.668 euros a través do Plan Único.

Deja una respuesta

Tu dirección de correo electrónico no será publicada. Los campos obligatorios están marcados con *

Este sitio usa Akismet para reducir el spam. Aprende cómo se procesan los datos de tus comentarios.