Demandan no Congreso “paralizar cautelarmente” a actividade de Ence até inspeccionar o estado da caldeira

“Instamos a Fiscalía a que actúe de oficio até verfiicar cal é o estado da planta de celulosa e os riscos sanitarios e ambientais para traballadores e veciños”, demanda Gómez Reino

Unidas Podemos vén de rexistrar unha iniciativa parlamentar que insta ao Goberno a decretar o peche cautelar da actividade industrial da planta de Ence en Pontevedra até que unha inspección independente verifique cal é o estado das instalacións e despexe calquera posible risco para a saúde dos traballadores e veciños, logo de que nun vídeo, o seu conselleiro delegado advertise da posibilidade de sufrir “un susto maiúsculo pola inestabilidade da caldeira”.

Instamos a Fiscalía a que actúe de oficio pola gravidade da situación e as posibles afeccións sanitarias e ambientais sobre o persoal e a poboación da contorna até que se certifique cal é o estado da planta de celulosa”, demanda o deputado de Unidas Podemos, Antón Gómez Reino.

O escrito rexistrado na Cámara Baixa por Unidas Podemos refírese a recente publicación dun vídeo no que o conselleiro delegado de ENCE Energía e Celulosa, Ignacio Comenares, se pronunciaba en contra da Lei de Cambio Climático que tramita o Congreso no que respecta a xestión do dominio público marítimo terrestre, regulado no artigo 18, e alerta do mal estado da caldeira de recuperación da planta condicionando a súa reparación a que se modifique o texto normativo nunha sorte de chantaxe intolerable con posibles consecuencias legais.

Colmenares, na citada publicación que a Asociación na Defensa da Ría (APDR) elevará ao Ministerio Público, falaba específicamente da posibilidade de sufrir un ‘susto maiúsculo ambiental en calquera momento’ pola inestabilidade da caldeira, e condicionaba o investimento dos 250 millóns  previstos no Plan Estratéxico 2019-2023 para o seu arranxo a modificación do proxecto de Lei de Cambio Climático do Goberno.

“Convén lembrar, sinalaba Gómez Reino, que Ence foi repetidamente condenada por delitos e irregularidades ambientais mentres a Xunta de Alberto Núñez Feijóo, con plenas competencias na materia, amosou unha descarada complicidade coa empresa e total iniciativa para fiscalizar a Ence e facer cumprir as sentenzas firmes na súa contra”.

A derradeira condena contra Ence foi en xaneiro desde 2021, cando a xustiza desestimou o seu recurso contra a paralización dunhas obras no complexo de Pontevedra que acometían sen licencia.  Moito antes, o Tribunal Supremo xa condenara ao Estado a paralizar a actividade de Ence na ría galega, “con neglixente execución” por parte dos Gobernos do PP que, estando en funcións, en xaneiro do 2016 prorrogaron a concesión a Ence até o 2073 amparándose nun artigo da lei de Costas que previamente tiñan modificado para satisfacer a empresa celulosa.

“Unha maniobra presuntamente ilegal que está aínda pendente de sentenza na Audiencia Nacional mentres a empresa segue facendo na planta de Pontevedra o que lle peta, mesmo incumprir as inversións pactadas como a ampliación da depuradora de Praceres”.

Unidas Podemos quere “poñer en valor o traballo feito nos últimos 30 anos pola Asociación pola Defensa na Ría (APDR) e fai un chamado as Administración públicas para iniciar unha inspección independente na planta que certifique cal é o estado real das instalacións e determinar de xeito veraz os posibles riscos”.

Foto portada: Ence

Deja una respuesta

Tu dirección de correo electrónico no será publicada. Los campos obligatorios están marcados con *

Este sitio usa Akismet para reducir el spam. Aprende cómo se procesan los datos de tus comentarios.