O Concello de Padrón promove a autocompostaxe como medida de aforro ambiental

O Executivo local adheriuse a un proxecto de Sogama mediante o que se entregarán 30 compostadores ás persoas do municipio que os soliciten

O Concello de Padrón recibirá 30 compostadores de 390 litros de capacidade, fabricados con materiais reciclados e reciclables, para distribuír entre a poboación das vivendas unifamiliares que dispoñan de xardín, horta ou terras de cultivo. O Executivo local vén de adscribirse ao programa de compostaxe doméstico de Sogama co obxectivo de que os fogares participantes no mesmo poidan poñer en valor a materia orgánica mediante a súa conversión en compost, un abono natural con excelentes propiedades fertilizantes para o chan, protexéndoo de pragas e enfermidades. Sogama tamén proporcionará aos usuarios que participen manuais didácticos de apoio, nos que se explica de forma detallada a operativa a seguir.

O alcalde de Padrón sinalou que “a autocompostaxe comeza a ser unha realidade e dende o noso Concello queremos apostar por fomentar prácticas que teñan un impacto positivo no medio ambiente. Con este novo acordo acadado con Sogama fomentaremos o aforro ambiental no noso municipio”.

Segundo explican dende Sogama, a fracción orgánica representa aproximadamente o 42% da composición media dunha bolsa de lixo doméstica. Cando se recicla en orixe, evitase o seu depósito no colector verde convencional, o que conleva un importante aforro ambiental e económico para o municipio.

A iniciativa pretende recuperar unha práctica tradicional no rural galego, como é a segregación da materia orgánica para alimento de gando e para a elaboración do compost, dun xeito máis hixiénico e cómodo.

As persoas que teñan interese por ter un composteiro doméstico poden solicitalo presentando unha solicitude xeral na Casa do Concello. O reparto realizarase por orde de entrada das peticións e a entrega terá lugar na sesión formativa que Sogama impartirá no municipio, nunha data aínda por determinar, para explicar o sistema de funcionamento deste proceso.

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.