A Deputación celebra o 30 aniversario do seu Conservatorio de Danza cun ciclo que será inaugurado polo Ministro de Cultura e contará coa estrela internacional Julio Bocca

O ministro de Cultura, José Manuel Rodríguez Uribes, e o presidente da Deputación, Valentín González Formoso, inaugurarán o ciclo  o 21 de abril no Teatro Colón da Coruña

A Deputación da Coruña conmemora o 30 aniversario do seu Conservatorio de Danza co ciclo ‘A Mar en Danza’, unha iniciativa que inaugurarán o vindeiro 21 de abril o Ministro de Cultura, José Manuel Rodríguez Uribes, e o presidente da Deputación, Valentín González Formoso, e que contará con grandes estrelas da danza a nivel internacional, entre elas o célebre bailarín Julio Bocca. O arxentino, unha das grandes figuras da danza a nivel mundial, ofrecerá por primeira vez en España dúas clases maxistrais logo da súa retirada dos escenarios como bailarín no ano 2007, coincidindo coa celebración do Día Mundial da Danza a finais de abril.

A Mar en Danza’ consiste nunha serie de actividades formativas vinculadas á danza que inclúen clases maxistrais, conferencias e actuacións de artistas de recoñecida traxectoria a nivel internacional. Así, ademais de Julio Bocca, a proposta tamén contará coa participación de figuras de excelencia, como é o caso de Igor Yebra, Lucía Lacarra ou Mathew Golding. Os estudantes e profesionais desta disciplina terán a posibilidade de recibir na Coruña as ensinanzas de bailaríns e bailarinas ou coreógrafos e coreógrafas de primeira liña mundial, sendo partícipes dos seus métodos de traballo e dos seus segredos para imprimir a súa personalidade no baile.

Con esta iniciativa, a Deputación “pretende posicionar á Coruña como un referente no ámbito da danza a nivel nacional”, explicou o presidente provincial, Valentín González Formoso, que destacou tamén o valor “da formación que recibirá o alumnado do conservatorio, unha oportunidade única para aprender dos mellores talentos do mundo e seguir os pasos de antigas alumnas e alumnos do Conservatorio que hoxe triunfan e ballets e compañías de danza de todo o mundo”.

O acto inaugural do ciclo celebrarase o 21 de abril no Teatro Colón da Coruña e estará presidido polo ministro de Cultura e Deporte, José Manuel Rodríguez Uribes, xunto ao presidente da Deputación da Coruña, Valentín González Formoso, o director do Conservatorio de Danza, Luciano Gómez, e a directora da iniciativa, Carlota Ojea, de Que Arte Producciones.

Será o 28 de abril cando Julio Bocca imparta a súa clase maxistral dirixida ao alumnado e ao profesorado do Conservatorio de Danza. Ao día seguinte, o 29 de abril, dará outra clase no Teatro Colón que será aberta ao público e, ao finalizar, terá lugar unha conferencia e coloquio baixo o título ‘Un café con Julio Bocca’. A entrada para a sesión, que comezará ás 18.30 horas, será gratuíta até completar a capacidade do recinto. Os convites poderanse retirar, previamente, a través do web https://teatrocolon.sacatuentrada.es/.

De cara ao outono, no mes de outubro, será o bailarín vasco Igor Yebra o encargado de continuar as clases maxistrais do ciclo ‘A Mar en Danza’. O día 6 dese mes será no Conservatorio de Danza e o día 7 no Teatro Colón, tamén con conferencia e coloquio.

Como broche dourado da primeira edición do ciclo, no mes de novembro presentarase no Teatro Colón o espectáculo ‘Fordlandia’ coa bailarina vasca Lucía Lacarra e o bailarín canadense Mathew Golding. O 19 dese mes Lucía Lacarra ofrecerá unha clase maxistral e unha conferencia sobre o espectáculo, que se presentará o 20 de novembro e ese día o alumnado do Conservatorio de Danza da Coruña poderá ver a preparación dos bailaríns antes da función.

Deja una respuesta

Tu dirección de correo electrónico no será publicada. Los campos obligatorios están marcados con *

Este sitio usa Akismet para reducir el spam. Aprende cómo se procesan los datos de tus comentarios.