Comunicado da Xestora do PSdeG-PSOE de Ourense, sobre a carta remitida polo presidente local do PP Jesús Vázquez

 A xestora do PSdeG-PSOE na cidade de Ourense quere pór de manifesto, trala carta recibida esta fin de semana por parte do presidente local do Partido Popular na cidade de Ourense, Jesús Vázquez e na que poñen como condición para sentarse a negociar a moción de censura, que o voceiro municipal e secretario provincial do PSdeG-PSOE de Ourense, Rafael Rodríguez Villarino non renunciará súa acta de concelleiro e deputado provincial.

Para a xestora socialista esta petición resulta unha chantaxe inadmisible e impropia do noso tempo, por parte dunha formación que se considera democrática, pero que con esixencias coma esta amosa a súa falta de respecto e a conculcación do lexítimo dereito de representación política que asiste aos concelleiros e deputados electos.

Neste sentido, a xestora do PSdeG-PSOE recorda que Rafael Rodríguez Villarino foi o candidato máis votado nas últimas eleccións municipais e contou co respaldo de 14.562 veciños e veciñas de Ourense, acadando un total de nove concelleiros socialistas con representación na actual corporación municipal.

A democracia falou ben claro nas últimas eleccións e a cidade deu o seu respaldo o PSdG-PSOE de Ourense e o seu voceiro. Queda demostrado que o Partido Popular de Ourense non quere mudar o sino da terceira cidade de Galicia, sumida no caos da man do actual alcalde, Gonzalo Pérez Jácome, ao que o PP prestou os seus votos para colocalo na cadeira de mando e ao que a día de hoxe segue apoiando, como se demostra na súa negativa a asinar a moción.

A xestora tamén quere agradecer publicamente e subliñar a xenerosidade e o traballo de Rafael Rodríguez Villarino a prol da cidade de Ourense, renunciando a encabezar a moción de censura como alcalde, segundo lle correspondería dados os resultados electorais. Un xesto sen precedentes que honra ao noso candidato e que amosa que para o PSOE o importante é a cidade de Ourense e rematar co desgoberno, parálise e desleixo na que vive sumida da man do microgoberno de Jácome, que conta co apoio e a complicidade do Partido Popular.

Consideramos que Ourense merece un goberno estable, que traballe por unha cidade totalmente esquecida polo seu goberno municipal e polo Partido Popular, polo que lle pedimos ao PP que se deixe de xogos antidemocráticos e que pense na cidadanía de Ourense, farta xa desta situación de bloqueo político. Ourense precisa dun goberno serio e acabar dunha vez por todas con esta situación.

Finalmente, a xestora socialista da cidade quere condenar o intento, por parte do Partido Popular, de desterrar e aniquilar politicamente, a Rafael Rodríguez Villarino, e a tódolos socialistas de ben que non comulgan coas ideas e prácticas antidemocráticas dos dirixentes populares de Ourense, ademais de amosar o seu apoio aos veciños e veciñas que foron vítimas do exilio e a emigración forzosa, como única saída fronte ao  empobrecemento e caciquismo na nosa provincia.

 

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.