O delegado da Xunta destaca o éxito do CITIC da Universidade da Coruña no ámbito da Intelixencia Artificial
Esta mañá, o delegado territorial da Xunta na Coruña, Gonzalo Trenor, visitou as instalacións do Centro de Investigación TIC (CITIC) da Universidade da Coruña, primeiro centro singular do Sistema Universitario Galego e o maior en Intelixencia Artificial de Galicia, para coñecer algúns dos proxectos de investigación punteiros nos que se está a traballar dende o centro. O vicerreitor de Política Científica, Investigación e Transferencia da UDC, Salvador Naya, o director e o subdirector do CITIC, Manuel F. González Penedo e Javier Pereira, respectivamente, mostraron ao delegado da Xunta diferentes proxectos destacados no ámbito da Intelixencia Artificial, área na que o CITIC é referente na comunidade galega. O delegado territorial da Xunta estivo acompañado pola concelleira do Concello da Coruña, Esperanza Peñalosa.
Trenor manifestou que “o CITIC é un éxito da colaboración entre a Universidade, a sociedade, a Administración e o tecido empresarial”, afirmando que “marca a diferencia con respecto doutros centros e está a definir o camiño da investigación e da colaboración con empresas para sacar adiante proxectos”. Para finalizar, indicou que “todos os coruñeses e os galegos podemos sentirnos orgullosos deste centro, ao que auguro un futuro moi prometedor”.
Durante a visita, Trenor interesouse polos avances dalgúns dos proxectos na área de Intelixencia Artificial e tivo a oportunidade de probar dispositivos de realidade virtual na sala de demostradores do centro, analizando en primeira persoa a experiencia de usuario.
Cabe destacar que o CITIC recibiu financiamento directo por parte da Xunta por máis 2,2 millóns de euros, dende o ano 2019 ata 2022, o cal constata a importancia que desde o Goberno galego se lle está dando ao centro.
Sobre o CITIC
O CITIC é un Centro de Investigación de Galicia que potencia o avance e a excelencia en I+D+i aplicado ás TIC. Impulsado pola Universidade da Coruña, no ano 2016 a Xunta de Galicia recoñece ao CITIC como Centro Singular de Investigación de Galicia 2016-2019 pola súa traxectoria científica. En 2019 renova esta acreditación e pasa a denominarse Centro de Investigación de Galicia. A actividade científica do CITIC estrutúrase en catro áreas de investigación principais: Intelixencia Artificial; Ciencia e Enxeñaría de Datos; Computación de Altas Prestacións e Servizos e Redes Intelixentes; e unha área de investigación transversal a todas elas, a de Ciberseguridade. Un dos obxectivos do CITIC pasa por poñer ao alcance da sociedade os resultados das súas investigacións, polo que no centro promóvense accións de ciencia cidadá e actividades divulgativas que potencien as vocacións científicas e garantan a renovación do talento no ámbito das TIC.
