O Concello da Coruña impulsa por primeira vez na súa historia un programa para previr a violencia filio-parental

O convenio de colaboración do proxecto “Convivindo”, cuxa achega municipal é de 19.000 euros, asinouse esta mañá coa Fundación Amigó co fin de lles dar unha resposta socioeducativa e terapéutica a aquelas familias con situacións de conflitos entre nais/pais e as súas fillas e fillos

A concelleira de Benestar Social, Yoya Neira, e o director territorial de Galicia da Fundación Amigó, José Antonio Morala, asinaron esta mañá en María Pita un convenio de colaboración para financiar o programa “Convivindo” de prevención da violencia filio-parental durante o ano 2021. A achega municipal é de 19.000 euros. No acto, que tivo lugar en María Pita, tamén estivo presente o presidente a nivel estatal da Fundación Amigó, Jesús Maria Echechiquia.

Yoya Neira sinalou que “é a primeira vez que o Concello da Coruña colabora nun proxecto para previr a violencia filio-parental” para, dixo, “dar resposta a necesidades que están aí, é unha realidade que adoita ocorrer de portas dentro”. A concelleira lembrou que o Goberno de Inés Rey “está en contra de todo tipo de violencias e por iso sempre vai tender a man a proxectos desta índole”. Agarda que esta vía de comunicación “que hoxe se abre” coa Fundación Amigó sexa moi próspera.

O proxecto Convivindo é unha proposta socioeducativa e terapéutica que pretende ofrecerlles unha resposta especializada a aquelas familias que se atopan en situación de exclusión debido a situacións de conflito entre as e os proxenitores e as súas fillas e fillos, especificamente as situacións de violencia filio-parental ascendente en que as e os descendentes mostran algún tipo de violencia cara ás súas figuras de referencia adultas.

A intervención lévase a cabo cun equipo multidisciplinar en varias fases diferenciadas en que se vai desenvolvendo o itinerario de cada familia. Realízase unha intervención integral de inicio a fin, a través de actividades de apoio, acompañamento especializado e control e seguimento de resultados, así como de prevención nas recaídas.

O programa divídese en dúas liñas de actuación: orientación e sensibilización (obradoiros e actividades de prevención e sensibilización co fin de evitar e minimizar os conflitos familiares) e de intervención socioeducativa e terapéutica (atención ás familias en conflito nas que xa está presente algunha forma de violencia filio-parental ascendente).

Desde a Fundación Amigó explicaron que a entidade comezou a súa andadura na prevención da violencia filio-parental no ano 2017 atendendo a 42 persoas usuarias directas e 17 familias. Desde esa data, as cifras foron aumentando até chegar a atender no que vai de ano 71 consultas só na Coruña.

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.