A historia dos fidalgos do Pazo de Mariñán ao descuberto

O Arquivo provincial revela os textos nos que se recollen libros de contas, inventarios e un álbum fotográfico que serven de fío condutor para coñecer un pouco máis sobre os que foron propietarios deste monumento

Nunha nova entrega do ‘Documento do mes’, o Arquivo da Deputación da Coruña dá a coñecer a historia dos fidalgos aos que pertenceu o Pazo de Mariñán, entre os que se atopa José María Bermúdez de Castro y Pardo, quen foi presidente da Deputación no 1836.

Ao longo deste ano, o ente provincial difunde textos do seu Arquivo na súa páxina web co obxectivo de desvelar anécdotas e curiosidades históricas da provincia. Nesta ocasión dá continuidade ao documento do mes de maio, que presentaba a herdanza de Gerardo Láncara, dando a coñecer nesta ocasión a vida da súa intricada parentela.

Ao longo dos anos, o Pazo de Mariñán foi pasando polas mans de numerosos fidalgos, tendo a súa orixe en Gómez Pérez das Mariñas. Foi este señor de grandes dominios o que ordenou no século XV edificar unha modesta e tosca fortaleza en Mariñán.

O Arquivo provincial amosa agora os documentos dos libros de contas, inventarios e un álbum fotográfico que serven como fío condutor para coñecer un pouco máis dos que foron os propietarios deste pazo. Neles inclúese o máximo esplendor de Mariñán cos Oca, que acometen as primeiras grandes obras do século XVIII. Ao falecer sen descendencia a filla de don Diego de Oca, o pazo pasa a mans de Josefa de Oca Ulloa, que ao casarse con Pedro Isidro de Yebra Pimentel e Suarez de Deza, señor de Láncara, engade un novo pazo e rendas ao patrimonio familiar.

Xa no século XIX, con don Apolinar Suárez de Deza e Caamaño, señor de Láncara e Bergondo, Mariñán mantén a súa magnificencia arquitectónica e botánica. A seguinte en herdar o patrimonio foron Aurelia Suárez de Deza e Tineo e Francisco, primoxénito de don José María Bermúdez de Castro y Pardo. Os Bermúdez Castro formaron parte da elite política da época isabelina, chegando a ser José María presidente da Deputación da Coruña e alcalde da Coruña. O último herdeiro deste patrimonio provincial foi Gerardo de Láncara, que outorga o testamento a favor da casa de Expósitos da Deputación.

A través desta achega o ente provincial continúa visibilizando o traballo de dixitalización do Arquivo Provincial, de importante valor como parte do patrimonio cultural galego, fonte de información e memoria das sociedades pasadas. As publicacións están comentadas pola historiadora e directora do Arquivo Provincial, Carmen Molina.

Os últimos do ‘Documento do mes’ estiveron dedicados á herdanza de Gerardo Láncara, á expedición de Balmis, á figura de Emilia Pardo Bazán e ao Mosteiro de Caaveiro.

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.