A Xunta reforza a oferta de FP na provincia de Lugo con 5 novos másteres e 14 ciclos duais

Nos réximes ordinario e modular incorpóranse seis novos ciclos que suman 136 prazas. O prazo de solicitudes estará aberto ata os días 2 ou 5 de xullo, dependendo da modalidade  escollida

A Consellería de Cultura, Educación e Universidade  reforzou a oferta de Formación Profesional na provincia de Lugo con cinco novos másteres e 14 proxectos na modalidade dual que comezarán a impartirse no curso 2021-2022.

O delegado territorial da Xunta en Lugo, Javier Arias, destacou que os másteres supoñen unha nova proposta que consolida a excelencia do modelo de FP en Galicia, ofrecendo a posibilidade de especializarse en profesións de alto valor engadido.

Lugo contará con cinco másteres e convértese na segunda cidade galega con maior oferta desta nova formación -só superada por Vigo, con seis-. En concreto, vanse impartir no CIFP As Mercedes os de Mantemento de vehículos híbridos e eléctricos e Dixitalización do mantemento industrial; no CIFP    Politécnico, os de Ciberseguridade en contornos das tecnoloxías de operación e Fabricación aditiva; e  no IES Muralla Romana o de Desenvolvemento de videoxogos e realidade virtual.

Así mesmo, a Consellería implantará unha formación experimental no CIFP Porta da Auga de Ribadeo sobre a construción e mantemento  de embarcacións  de fibra, deportivas e de recreo, en virtude dun convenio cunha empresa da contorna.

Na FP dual darán comezo 14 proxectos en sete institutos da provincia. O IES de Foz, o CIFP As Mercedes e o Politécnico -ambos en Lugo- ofertan tres ciclos cada un; o IES A Pinguela de Monforte de Lemos dous, e inician unha nova proposta o IES Val do Asma de Chantada, o IES San Rosendo de Mondoñedo e o CFEA Pedro Murias de Ribadeo.

Por último, nos réximes ordinario e modular para persoas adultas –presencial e a distancia– incorpóranse seis novos ciclos que suman 136 prazas na provincia. Como é habitual a oferta de FP flutúa para adaptarse ás necesidades do tecido produtivo e ás características da poboación de cada zona, o que supón unha oportunidade laboral para os titulados. No novo mapa desaparecen ou modifícanse algúns ciclos, se ben a oferta permanece en datos moi similares. En total, a Consellería ofrece en Lugo nos réximes ordinario e modular 4.220 prazas en primeiro curso, en 165 ciclos e programas formativos autorizados.

A modificación da oferta nace dun proceso de diálogo coa comunidade educativa, no que as peticións foron analizadas pola Inspección educativa dos centros, tendo en conta a oferta global de Galicia en cada ciclo, a demanda do alumnado, a inserción de cada ciclo e as necesidades do tecido produtivo.

Calendario de admisión

O prazo de presentación de solicitudes nos réximes ordinario e para as persoas adultas  permanecerá aberto ata o 5 de xullo ás 13 h. A matriculación da primeira adxudicación de prazas comezará o 20 de xullo ás 9 h., ata o 26 de xullo ás 13 h. A continuación, unha vez se comproben as prazas que quedaron vacantes, procederase á segunda adxudicación de prazas, cuxo período de matrícula irá do 28 de xullo ás 9 h. ao 30 de xullo ás 13 h.

Tamén nos másteres de FP  o prazo de presentación de solicitudes rematará o 5 de xullo ás 13 h., e o de matriculación do 20 de xullo ás 9 h. ao 26 de xullo ás 13 h.

Canto á FP Dual, a presentación de solicitudes será ata o 2 de xullo ás 13 h. O período de selección por parte da empresa colaboradora e do centro educativo irá do 8 ao 14 de xullo, e as persoas finalmente seleccionadas poderán matricularse do 16 de xullo ás 9 h. ao 23 de xullo ás 13 h.

O calendario detallado pode consultarse no Portal de FP.

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.