Gonzalo Caballero. A Atención Primaria está «desbordada» e a Xunta pecha cama e non cubre vacacións dos sanitarios

O secretario xeral do PSdeG, Gonzalo Caballero, alertou este luns da saturación que está a vivir a sanidade pública e, nomeadamente, a atención primaria, que está “desbordada” ata o punto de rexistrar “por primeira vez” listas de espera que poden chegar ata os 15 días e moitas veces só para ser atendidos por vía telefónica.

“O risco desta quinta onda da covid coincide coa falla de compromiso e de atención que o goberno da Xunta lle dedica á sanidade pública galega”, evidenciou o líder do PSdeG, quen censurou que o goberno de Feijóo optase por pechar 600 camas nos hospitais galegos neste verán e que non se estean cubrindo as vacacións de profesionais dos centros de saúde.

A xeito de mostra da saturación que denunciou na atención primaria, Gonzalo Caballero sinalou que “unha médica de Vigo veuse obrigada a atender nun PAC a 98 pacientes nun so día”, o que supón “tres veces máis do que establecen os canons de bo funcionamento da atención primaria”.

“A atención primaria vese desbordada con persoal insuficiente porque a Xunta non está facendo os seus deberes”, sentenciou, consciente de que Feijóo “non aproveita os fondos que ten” para contratar persoal ata o punto de que “non se están cubrindo as vacacións de persoal sanitario”.

Neste escenario, o responsable do PSdeG deixou claro que “ou fortalecemos a sanidade pública galega ou estaremos avanzando na dirección incorrecta e contraria ao que esixe a situación de pandemia que estamos a vivir”, na que temos hoxe máis de 10.000 contaxiados, máis de 100 hospitalizados e máis de 20 persoas nas UCI por covid.

AS “DISTINTAS CARAS DO PP” CO PROCESO DE VACINACIÓN

Ao fío da pandemia, Gonzalo Caballero fixo fincapé na importancia de “seguir vacinando” e censurou que a Xunta volva plantexar que non chegan vacinas suficientes a Galicia cando “o goberno de España está distribuíndo as vacinas de acordo aos protocolos”.

Ao fío disto, censurou o “cinismo” e a “falla de responsabilidade” do PP ao “dicir que non chegan vacinas, cando todas as que están chegando se distribúen, pero á vez Ayuso garda na neveira da Comunidade de Madrid un millón de vacinas”.

“Sería bo que nesta cita que tiveron Feijóo e Ayuso se puxeran de acordo no que queren facer”, sinalou o máximo dirixente do PSdeG,  en relación á “gran aperta do PP máis conservador e rancio que se deron en Compostela esta fin de semana”.

Porque, afondou, “xestionar unha pandemia é xestionar un tempo de corresponsabilidade, pero o PP non está tendo esa corresponsabilidade”, concluíu.

INCREMENTO DO RISCO DE POBREZA

Por último, Gonzalo Caballero alertou sobre o incremento do risco de pobreza nun momento no que os últimos datos do INE amosan que “en Galicia se disparou coa pandemia” e, de feito, “cunha taxa superior á do conxunto de España”, onde os ingresos medios son superiores aos que perciben os galegos en nóminas ou pensións.

É por iso que, incidiu, “é o momento de despregar as políticas sociais que non está facendo a Xunta de Galicia”, como un plan contra a pobreza en Galicia, medidas para impedir a pobreza infantil ou conseguir que os fondos que a Xunta aforra na Risga poidan empregarse como un complemento para o Ingreso Mínimo Vital.

Todas estas cuestións, recalcou Gonzalo Caballero, foron incluídas entre as 350 medidas que o Grupo Socialista impulsou na comisión de reactivación e que recibiron o voto en contra do PP. “O PP non está nin se lle espera”, finalizou.

 

Deja una respuesta

Tu dirección de correo electrónico no será publicada. Los campos obligatorios están marcados con *

Este sitio usa Akismet para reducir el spam. Aprende cómo se procesan los datos de tus comentarios.