A Asociación Cidadá Contra a Letra Pequena – CON LUPA convoca manifestación en Lugo para esixir unha rebaixa da factura da luz

Asociación Cidadá Contra a Letra Pequena – CON LUPA convocou unha manifestación en Lugo para denunciar e protestar contra o brutal incremento do prezo do quilovatio (kWh), impulsado polas compañías eléctricas para manter os seus millonarios beneficios, e que, xunto co novo sistema de tarifas, representa unha nova e abusiva suba da factura da luz para as familias, as explotacións agrarias, as pequenas e medianas empresas, o comercio e a hostalería, os e as traballadoras autónomas…, do noso país.

A luz eléctrica é un ben de primeira necesidade, imprescindible para desenvolver calquera actividade, por iso, de ter que pagar un imposto indirecto como o IVE, este ten que ser do tipo superreducido do 4%.

Por outro lado, Galiza produce electricidade a esgalla, exportando máis do 30 %, sen que isto repercuta nun menor custe do recibo da luz para nós. Aquí asumimos os custes económicos, sociais e ambientais de producila sen recibir nada a cambio. E máis, o ser unha tarifa única, temos que compensar no noso recibo, entre outros, parte dos custes que supón o transporte e a perda de enerxía que se produce no traslado da electricidade a outros territorios do Estado.

Por todo iso, CON LUPA, convocou unha MANIFESTACIÓN que se vai celebrar o XOVES, DÍA 8 DE XULLO, ÁS 6 DA TARDE, con saída da PRAZA MÁRTIRES DE CARRAL (fronte ao Parque de San Roque), para esixir unha enerxía xusta e sostible e unha tarifa eléctrica galega que abarate a factura da luz para todos os galegos e galegas.

CON LUPA convida á veciñanza de Lugo e provincia a participar e manifestarse en contra do abuso das eléctricas e a favor dunha rebaixa inmediata da factura da luz.

Deja una respuesta

Tu dirección de correo electrónico no será publicada. Los campos obligatorios están marcados con *

Este sitio usa Akismet para reducir el spam. Aprende cómo se procesan los datos de tus comentarios.