Adxudicada a ampliación da DP-0510 de Confurco a Orro, en Culleredo

As obras incluirán a execución dunha nova rotonda, a mellora do trazado e a creación dunha senda peonil de dous metros de ancho, co obxectivode mellorar a seguridade no tráfico rodado e peonil

A Deputación da Coruña vén de adxudicar po 1.067.267.71 euros as obras de ampliación da estrada provincial DP-0510 ao seu paso polo concello de Culleredo. O contrato, asinado esta mañá na sede da institución provincial, permitirá realizar o ensanche, mellora da estrada e creación dunha senda no tramo que conecta o núcleo de Confurco, en Culleredo, co de Orro.

A actuación enmárcase dentro do Plan de Investimento en Vías Provinciais e a través dela efectuaranse importantes melloras no vial desde o seu inicio, na intersección coa vía provincial DP-3109, ata o punto quilométrico 2+940. Unhas tarefas que permitirán incrementar a seguridade ao longo destes tres quilómetros do vial, mellorando os accesos aos núcleos de Figueiras e As Caíñas, así como creando espazos máis seguros para as persoas que circulan por este tramo.

A calzada actual conta cun ancho medio de 5 metros que se ampliará para albergar dous carrís de circulación de 3 metros, beiravías de medio metro cada unha e unha cuneta de 0,75 metros na marxe esquerda. Ademais, co obxectivo de garantir a seguridade das persoas que residen e transitan pola contorna, construirase unha senda de 2 metros de ancho na marxe dereita da vía.

Dentro das tarefas inclúense o tratamento de accesos e interseccións, adecuación da velocidade ás características da vía e ordenación de accesos. Á súa vez, tamén se construirá unha glorieta no punto quilométrico 2+000 co obxectivo de favorecer os cambios de sentido e de eliminar os puntos máis perigosos para o tráfico rodado e peonil.

O ente provincial xa destinou 136.313,65 euros para a adquisición dos 141 terreos de prado, monte e labradío necesarios para levar a cabo esta obra.

O Concello de Culleredo asumirá as obras de saneamento na estrada. Consistirán na colocación de colectores baixo a cuneta, coa instalación de rexistros. Con esta obra poderase logo derivar o servizo a ramais interiores.

O presidente provincial, Valentín González Formoso, destacou que coa adxudicación desta importante obra, a Deputación da luz verde definitiva a unha antiga demanda do Concello de Culleredo e segue apostando pola mellora da seguridade vial e peonil nas estradas provinciais.

O alcalde de Culleredo e deputado provincial, José Ramón Rioboo, manifestou tamén a súa satisfacción pola posta en marcha das obras, un proxecto moi esperado pola veciñanza de Orro, que comezará este mesmo verán e contarán cun prazo de execución de un ano.

Rioboo salienta que a realización desta actuación abrirá as portas a acometer proxectos de mellora no interior do núcleo, para o que era preciso desenvolver primeiro a ampliación da estrada principal e dotación de saneamento.

Deja una respuesta

Tu dirección de correo electrónico no será publicada. Los campos obligatorios están marcados con *

Este sitio usa Akismet para reducir el spam. Aprende cómo se procesan los datos de tus comentarios.