A Deputación adxudica as obras da nova senda ciclista de Cecebre

A senda terá 32 quilómetros de lonxitude e enlazará coa Rede Ciclista Metropolitana da Coruña

A Deputación da Coruña acolleu hoxe a sinatura dos contratos para a execución das obras de construción da nova senda ciclista que percorrerá a contorna do encoro de Cecebre, espazo natural de referencia na provincia, e conectará co concello de Carral. Trátase de 32 novos kilómetros de ruta que discorrerá polos municipios de Abegondo, Betanzos, Bergondo e Carral, constituíndo unha alternativa perfecta para coller a bicicleta ou pasear.

O investimento das obras, cofinanciadas nun 80% con fondos europeos FEDER a través do Instituto para a Diversificación e Aforro da Enerxía  (IDAE), ascende a 1.742.073 euros e teñen un prazo de execución de 10 meses, polo que estarán rematadas para o vindeiro verán.

O presidente provincial, Valentín González Formoso, destacou que a Deputación “está a facer unha importante aposta para promover un novo modelo de mobilidade sostible na nosa provincia, no que a bicicleta cobra un gran protagonismo” e explicou que a través deste tipo de proxectos, o ente provincial “pretende contribuír a unha mellora da vertebración do territorio, chegando as senda ciclistas non só as grandes cidades e o seu entorno, senón tamén aos territorios do rural”.

Uns proxectos que, segundo explicou o presidente da Deputación, «suman un importante investimento de máis de 9 millóns de euros e que permitirán crear 130 novos quilómetros de vías ciclistas en 19 concellos da provincia» con proxectos singulares coma esta ruta ciclista na contona do encoro de Cecebre; a creación da primeira Vía Verde da provincia, que conectará Santiago e Cerceda, ou a construción de sendas ciclables en 11 faros da zona das comarcas de Ferrolterra-Ortegal, Costa da Morte e ría de Muros.

Destes 9 millóns de euros, 7,2 proveñen de fondos FEDER a través das axudas que convoca o IDAE para proxectos de economía baixa en carbono en concellos de menos de 20.000 habitantes e os restantes 1,8 millóns son financiados con fondos propios da Deputación da Coruña.

Unha ruta a carón da ribeira do encoro de Cecebre

Esta nova senda ciclista contará con tres tramos diferenciados, o primeiro deles transcorrerá polos municipios de Abegondo, Bergondo, Betanzos e Carral e ven de ser adxudicado por 661.010 euros. O segundo e terceiro discorrerán por Abegondo e Carral, contando o primeiro con 631.886 euros de investimento e con 449.177 euros o segundo.

O novo carril bici discorrerá en gran parte polo territorio da Reserva da Biosfera Mariñas Coruñesas e Terras do Mandeo, empregando como base estradas, rúas, pistas municipais, camiños rurais e sendas de titularidade pública. Peóns e ciclistas compartirán ditos camiños, polo que a Deputación acometerá diferentes actuacións que permitirán compatibilizar esa coexistencia a través de renovación de vías, mellora na seguridade viaria e instalación de sinalización ambiental e turística, respectando sempre o valor medioambiental da contorna.

A ruta, dividida nos tres tramos sinalados con anterioridade, discorrerá ao carón da ribeira do encoro de Cecebre, saíndo un ramal para Guísamo e outro que aproveita o Val do Barcés para chegar a Carral, discorrendo por núcleos de poboación como Sarandóns e pasando por lugares como a contorna do Pazo de Macenda, a ETAP de Cañás ou o Observatorio de Aves de Crendes, para rematar no monumento aos Mártires de Carral.

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.