A unidade móbil para a doazón de sangue estará en Narón os días 19, 20 e 21 de agosto

Unha unidade móbil da Axencia para a Doazón de Órganos e Sangue (ADOS) permanecerá ao carón do novo Centro de Saúde o xoves 19 de agosto en horario de 9.30 a 14.30 horas e de 15.30 a 21.00 horas e o sábado 21 de agosto, nesa mesma ubicación, entre as 10.00 e as 15.00 horas

O venres, 20 de agosto, a unidade móbil situarase nas inmediacións da Praza da Constitución, na Solaina, entre as 15.30 e as 21.00 horas.

As persoas que acudan a doar poderán reservar cita previamente chamando –de balde- ao número de teléfono 900 100 828. Antes da doazón é preciso almorzar e no caso de xantar, deberán agardar dúas horas para realizar a extracción.

Antes de doar haberá que presentar ao persoal da unidade móbil a tarxeta de doazón, o DNI ou algún documento similar e informar no caso de que se estea tomando algún medicamento. Poden acudir a doar as persoas maiores de 18 anos e que pesen máis de 50 quilos.