Feijóo resalta o novo Centro de Saúde do Saviñao como «exemplo do compromiso coas infraestruturas sanitarias»

Reitera o compromiso do Goberno galego de seguir coa transformación da Atención Primaria, a través de novas tecnoloxías e cun modelo máis proactivo e con vocación comunitaria

O presidente do Goberno galego, Alberto Núñez Feijóo, resaltou hoxe o novo Centro de Saúde do Saviñao como «exemplo do compromiso coas infraestruturas sanitarias», cun investimento de 8 millóns de euros no sur da provincia de Lugo.

Durante unha visita as instalacións desta nova obra, Feijóo destacou outras actuacións importantes como: novos centros de saúde nos concellos de Carballedo, Sarria e Monterroso, aos que agora se une o de O Saviñao tras un investimento de 1,12 millóns de euros e aos que se sumará tamén o futuro novo centro de saúde de Antas de Ulla, cuxo proxecto está xa licitado. Por outra banda, o centro hospitalario do sur da provincia, o Hospital Público de Monforte, está a ser reformado agora mesmo nunhas obras que supoñen os primeiros 1,5 millóns de euros dun Plan Director que se desenvolverá durante os próximos anos e que acadará os 15 millóns.

Logo de recordar que nesta última década a Xunta construíu ou renovou 89 centros de saúde, cun orzamento de máis de 120 millóns, o titular do Executivo autonómico subliñou que os 3.300 veciños da comarca do Saviñao «contarán cun centro con máis e mellores servizos, con 7 consultas, unha zona pediátrica con consulta de enfermaría, sala de mostras, sala de reunións e sala de estar».

Nesta liña, Feijóo reiterou «o compromiso do Goberno galego de seguir transformando a Atención Primaria, a través de novas tecnoloxías e cun modelo máis proactivo e con vocación comunitaria». Con este obxectivo, destacou a posta en marcha de avances como a nova Lei de Saúde, aprobada este ano e que obriga a elaborar plans locais de saúde, coa previsión de que antes de final de ano varios servizos das sete áreas comecen a traballar de xeito máis autónomo; e de medidas como o uso de novas aplicacións informáticas para asegurar a resolución das chamadas aos centros; as axendas de calidade para mellorar a xestión en todos os centros; e os cursos de habilidades directivas para xefes de servizo e coordinadores, que se iniciarán en outubro.

Deja una respuesta

Tu dirección de correo electrónico no será publicada. Los campos obligatorios están marcados con *

Este sitio usa Akismet para reducir el spam. Aprende cómo se procesan los datos de tus comentarios.