Novo revés xudicial do lobby mineiro galego con dúas sentenzas do TSXG sobre as subvencións para enxeñaría social e lavado verde

A Cámara Oficial Mineira e a Asociación Galega de Áridos tentaron impedir xudicialmente o acceso aos expedientes das subvencións que recibiron. A semana que ven a Xunta promove no Gaiás unha “pasarela” dos proxectos mineiros máis destructivos e contaminantes

O Tribunal Superior de Xustiza de Galicia chumbou con dúas novas sentenzas as tentativas da Cámara Oficial Mineira de Galicia e da Asociación Galega de Áridos de impedir o acceso aos expedientes das subvencións outorgadas pola Xunta de Galicia coas que o sector continúa os seus esforzos de propaganda, enxeñaría social e lavado verde.

En 2019, coñecíase que a Xunta outorgara á Cámara Oficial Mineira 130.000 euros para un “plan de comunicación dixital”, a “creación de unidades dedácticas sobre minaría para nenos” a divulgación do “patrimonio mineiro”, ás que se sumaron outros 76.000 euros na convocatoria seguinte. No caso da Asociación Galega de Áridos, as sentenzas pronúncianse sobre a tentativa de impedir o acceso aos expedientes doutra subvención para crear materiais educativos para crear unha imaxe social positiva das explotacións.

Todas estas campañas foron amplamente criticadas non só por asociacións ecoloxistas e veciñas, máis pola propia federación de ANPAs e tamén no Parlamento, que censuraron o uso de fondos públicos para tentar condicionar a posición das escolares ante os sucesivos conflictos sociais e ambientais provocados pola minería.

Desobediencia das sentenzas e falta de transparenciada Xunta

A pesar destas sentenzas e da súa firmeza, a Xunta de Galicia aínda non deu acceso aos expedientes de subvencións. Sorprende aos movementos sociais o grado de obstaculización da Xunta neste caso, unha vez que transcurriron dous anos desde a primeira solicitude de información, dende a Fundación Montescola anúnciase que se levarán os feitos á Fiscalía ante os indicios de criminalidade.

Lonxe de recuar no seu apoio á enxeñaría social e lavado de cara verde, a Xunta leva a un novo nivel os seus esforzos de propaganda colaborando cunha cimeira sobre “Minerais estratéxicos” que organizará no Gaiás a propia Cámara Mineira, e na que compartirán espazo Francisco Conde, vicepresidente segundo de la Xunta de Galicia, e María Coutinho, subdirectora xeral de Recursos Minerais, con representantes de empresas como Cobre San Rafael, promotora do proxecto de mina de cobre de Touro que foi chumbado ao recibir o ano pasado unha declaración de impacto ambiental negativa.

Durante tres días, desfilarán polo evento que terá lugar nas instalacións públicas da Cidade da Cultura, representantes dos proxectos mineiros máis destructivos e contaminantes, e que se veñen denunciando ante as distintas administracións e instancias xudiciais: a mina de Varilongo en Santa Comba, cun proceso penal en curso no que está imputado o ex-director xeral de minas Ángel Bernardo Tahoces; a mina de San Finx, con varios procesos penais, nos que están imputados varios funcionarios e de novo o propio Tahoces; a mina de Touro con  denuncias e sancións por vertidos e drenaxe ácido de mina continuado; ou a mina da Penouta, en Viana do Bolo, con vertidos constantes con metais pesados na Rede Natura 2000.

Un evento pagado con fondos públicos para enaltecemento e publicidade dos proxectos mineiros no camiño de lograr a tan ansiada licenza social que non teñen.

Dende a Plataforma Veciñal Mina Touro O Pino Non temos claro que existe outra opción de vida e outra opción de futuro económico sostible, e censuramos que a XUNTA dea carta de natureza a un proxecto fracasado,  ambientalmente inviable como o da mina de Touro coa súa participación neste evento.En todo caso poderá aproveitar o momento para solicitar publicamente a Cobre San Rafael e demáis empresas vinculadas que actualicen o seu plan de restauración.

Un comentario

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.