A Coruña, principio e final do Raid Gallaecia-AR World Championship 2021

Boa parte do percorrido pasará pola provincia: o lago das Pontes, as Fragas do Eume, a Reserva da Biosfera Mariñas coruñesas e Terras do Mandeo, a Costa de Dexo e a cidade da Coruña

A sede do Real Club Náutico da Coruña acolleu a presentación do Raid Gallaecia- AR World  Championship 2021, o Campionato do Mundo de carreiras de aventura, que conta coa colaboración da Deputación da Coruña e que partirá mañá sábado 2 de outubro desde Monforte de Lemos finalizando, unha semana despois, o sábado 9 de outubro na Coruña.

Blas García, deputado de Promoción Económica da Deputación da Coruña, Juan Ignacio Cordeiro, primeiro tenente de alcalde e concelleiro de Relacións Institucionais, Turismo e Seguridade Cidadá da Coruña e Pablo López Franco, director de carreira, presentaron o acto acompañados polos representantes das institucións e os patrocinadores que fan posible o Raid  Gallaecia- AR World  Championship 2021, entre eles Cristina Capelán, deputada de Deportes.

Tamén estiveron os capitáns de 6 os 91 equipos participantes: o francés Sébastien Raichon (400 team Naturex), o español Urtzi Iglesias (Torpedo Vidaraid), o sueco Bjørn Rydvall (Orbital AR), o estoniano Silver Eensaar (Estoniana ACE Adventure-A Sportiva), a brasileira Camila Nicolau (BOA Brazil Multisport) e o estadounidense Mark Lattanzi (Strong Machine AR).

Blas García remarcou o compromiso da provincia da Coruña con «esta gran aventura a nivel mundial». O responsable de Promoción Económica recoñeceu que «a Deputación da Coruña tiña que apoiar este evento porque boa parte do percorrido pasará pola nosa provincia: o lago das Pontes, as Fragas do Eume, a Reserva da Biosfera Mariñas coruñesas e Terras  do Mandeo, a Costa de  Dexo e a cidade da Coruña».

Pablo López Franco, que agradeceu o apoio das institucións e patrocinadores, destacou a «enorme satisfacción» que significa «organizar un Campionato do Mundo con sede na nosa cidade». O director de carreira recoñeceu que compartir este fito cos seus veciños «é algo que despois de tres edicións de Series Mundiais estabamos a desexar».

Juan Ignacio Cordeiro resaltou que «non hai mellor reclamo turístico agora mesmo para Galicia e A Coruña que o Raid  Gallaecia- AR World  Championship 2021». O primeiro tenente de alcalde e concelleiro de Relacións Institucionais, Turismo e Seguridade Cidadá engadiu que a Torre de Hércules «alumará o último esprint da carreira» e lembrou aos participantes que «van descubrir unha terra fantástica e que lles vai a recibir cos brazos abertos».

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.