Arias destaca o labor de dinamización do centro sociocomunitario de Vilalba

O delegado territorial da Xunta asistiu á presentación dunha das actividades desta tempada, Exercita o teu corpo, na que participarán unhas 60 persoas maiores ata o mes de xuño

O delegado territorial da Xunta en Lugo, Javier Arias, destacou hoxe o labor de dinamización do centro sociocomunitario de Vilalba, “un espazo aberto a toda a cidadanía no que se fomenta a convivencia e a participación social e se propicia o envellecemento activo”, dixo.

Arias participou na presentación dunha das actividades desta tempada, Exercita o teu corpo, á que asistirán entre outubro e xuño arredor de 60 persoas maiores da capital chairega e doutros concellos da comarca. As clases desenvolveranse por grupos no pavillón municipal e, ademais de facer exercicio, impartiranse nocións sobre hábitos de vida e alimentación saudables.

Na programación prevista tamén figuran actividades de estimulación cognitiva; talleres de manexo de móbiles dirixidos a persoas xubiladas; cursos para aprender a facer trámites por internet e realizar videochamadas e clases de encaixe de bolillos, entre outras.

O centro, dependente da Consellería de Política Social, ofrece así mesmo terapia ocupacional e outros servizos con moita demanda como podoloxía e rehabilitación. Dispón dunha aula de informática con acceso a internet, biblioteca, sala de usos múltiples, ximnasio e cafetería con cociña e comedor.

Arias puxo en valor que os centros sociocomunitarios “son recursos de proximidade que ofrecen ás persoas de calquera idade a posibilidade de socializar e participar en actividades moi diversas nunhas instalacións axeitadas”. Ao respecto, lembrou que a Consellería investiu nos últimos anos máis de 33.000 euros en obras como o acondicionamento da cafetería.

A Xunta xestiona outros tres centros similares na provincia, nos concellos de Lugo, Mondoñedo e Ribadeo.

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.