Camiño Escena Norte clausura a súa actividade escénica en Compostela co espectáculo ‘Lloviendo ranas’

O Salón Teatro compostelán acolle este domingo, 10 de outubro, unha proposta escénica da compañía vasca Ados Teatroa e un encontro posfunción co público, ambas as dúas actividades posibles grazas ao apoio da Axencia Galega das Industrias Culturais (Agadic) da Xunta de Galicia

O programa de intercambio cultural Camiño Escena Norte clausura este domingo 10 no Salón Teatro de Santiago de Compostela a súa actividade escénica cunha dobre proposta, función e encontro co público, que conta co apoio da Xunta de Galicia a través da Axencia Galega das Industrias Culturais (Agadic). O Salón Teatro acolle así o peche do programa de exhibición aberto ao público, nomeado Itinerario Constelacións, que o proxecto interterritorial estivo a desenvolver desde o 12 de setembro nas catro comunidades autónomas implicadas na iniciativa: Galicia, Asturias, Cantabria e Euskadi.

Lloviendo ranas, a obra responsable de clausurar o programa de exhibición Itinerario Constelacións, é autoría da compañía Ados Teatroa de Euskadi e nela reconstrúese, a través de flashbacks, a viaxe emocional e vital dunha persoa con enfermidade mental que parece a piques de se suicidar. O texto está baseado nun laboratorio creativo no que se traballou cunha ducia de persoas con diversidade mental. O laboratorio cristalizou nesta obra na que os testemuños reais se funden coa trama principal nunha narración homoxénea que defenden no escenario actores e actrices con e sen diagnose de enfermidade mental.

Logo de rematar a obra, que ten a cualificación de espectáculo inclusivo recomendado pola Rede Española de Teatros e Auditorios, o público terá a oportunidade de dialogar coa compañía nun encontro posfunción no que tamén participará a actriz Victoria Teijeiro, de La Quintana Teatro.

Coas actividades do domingo 10 remata o itinerario por terras galegas do Camiño Escena Norte, logo de programar nove funcións nos concellos de Arzúa, Lugo, Melide, Mondoñedo, Negreira, Ribadeo, Sobrado dos Monxes, Vilalba e Santiago de Compostela. Cómpre salientar que os espectáculos estiveron acompañados de actividades paralelas de mediación, como obradoiros de contextualización ou de movemento ou encontros co público, como o que se vai desenvolver en Santiago o  vindeiro domingo e na que participará Ados Teatroa. Alén desta compañía, as outras que participaron na edición galega de Camiño Escena Norte neste 2021 foron a tamén vasca Marie de Jongh, as asturianas A66 Producciones e Meraki Cía e as cántabras Anabel Díez / El Tejo Producciones, Babirusa Danza e La Machina Teatro.

Camiño Escena Norte bota o pano este domingo no seu programa de exhibición, mais proseguirá no ámbito profesional con novas sesións de Cruzamentos, a rede de estadías de intercambio escénico, artístico e profesional que rematará no mes de novembro en Euskadi, co encontro entre a compañía galega Caramuxo Teatro e a vasca Marie de Jongh.

Axenda Camiño Escena Norte 2021 – 10 de outubro

10.10.2021 | 18.00 a 19.00 horas no Salón Teatro, Santiago de Compostela
Ados Teatroa (Euskadi). Lloviendo ranas.
Entrada libre ata completar a capacidade do espazo. Retirada de convites na billeteira do teatro dende as 16.00 h. Máximo 2 convites por persoa. Público adulto.

10.10.2021 | 19.00 horas Salón Teatro, Santiago de Compostela
Posfunción. Ao rematar a función de Lloviendo ranas, celebrarase un encontro entre o público asistente e a compañía. Acompaña Victoria Teijeiro (La Quintana Teatro).

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.