O Liceo de Betanzos acollerá ata o 20 de novembro a exposición coas imaxes finalistas do I Concurso de Fotografía do Camiño Inglés

A mostra foi inaugurada polo presidente e a xerente da Asociación de Concellos do Camiño Inglés, Manuel Mirás e Cristina García, e polo concelleiro de Medio Ambiente, José Luís Lagares

O Liceo de Betanzos acollerá ata o 20 de novembro unha exposición coas 21 imaxes finalistas do I Concurso de Fotografía do Camiño Inglés. Unha mostra que foi inaugurada polo presidente e a xerente da Asociación de Concellos do Camiño Inglés, Manuel Mirás e Cristina García, e o concelleiro de Medio Ambiente e Medio Rural de Betanzos, José Luís Lagares.

A exposición recolle 21 das 112 fotografías presentadas á primeira edición deste concurso, promovido pola Asociación de Concellos do Camiño Inglés e a Asociación El Camino Inglés. Manuel Mirás agradeceu a colaboración do Concello de Betanzos “á hora de facilitarnos un escenario como o Liceo para acoller unha exposición coa que buscamos poñer en valor os recursos de cada un dos municipios do Camiño. Ademais, dado que foron feitas tanto por peregrinos como por veciños da zona, nos ofrece un punto de vista moi interesante”.

Esta exposición iniciou a súa itinerancia en Ferrol, coincidindo coa celebración da Primavera no Camiño, e xa puido ser vista polos veciños e veciñas de Neda, Ordes e Fene. “A nosa intención é continuar polos outros doce municipios que forman parte da Asociación”, indica Manuel Mirás.

Presenza en Fairway

Por outra banda, a Asociación de Concellos do Camiño Inglés participará na cuarta edición do Fairway, do 7 ao 9 de novembro no Palacio de Congresos de Santiago. A entidade estará presente no stand da Deputación da Coruña. Así mesmo, o seu presidente participará o luns 8 de outubro, ás 11:30 horas, na mesa de debate “Reactivando o Camiño de Santiago”, que será presentada por Melchor Fernández, coordinador do grupo de investigación GAME-IDEGA. Unha mesa na que se analizará o estado actual dos Camiños despois de máis de ano e medio de pandemia e os cambios que isto supuxo na xestión das diferentes rutas.

Manuel Mirás porá en valor o labor desenvolto pola Asociación de Concellos do Camiño Inglés, entidade que agrupa a 16 municipios polos que discorre esta ruta xacobea e que busca “acadar o equilibrio entre o desenrolo económico e a conservación do Camiño, así como mellorar as infraestruturas da ruta para facer que a experiencia do peregrino sexa memorable”.

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.