Clusaga presenta a Oficina Técnica que impulsará a transformación do sector alimentario

A creación da oficina técnica está acollida nun convenio entre Clusaga e a Administración galega para a posta en marcha do Programa Next Generation Galicia Food que foi recentemente asinado

O Clúster Alimentario de Galicia (Clusaga) e a Xunta de Galicia acaban de poñer en marcha a Oficina Técnica de Apoio ao Programa Next Generation Galicia Food, unha ferramenta que nace para impulsar a recuperación e a transformación do sector de alimentación e bebidas de Galicia a través da mobilización de proxectos no marco do Plan de Recuperación, Transformación e Resiliencia vinculado aos fondos Next Generation (NGEU).

O acto de lanzamento, que tivo lugar este venres no edificio Fontán da Cidade da Cultura, foi presidido por Francisco Conde, vicepresidente segundo e conselleiro de Economía, Empresa e Innovación, asemade contou coa intervención de Juan José de la Cerda, presidente de Cluster Alimentario de Galicia (Clusaga) e Fernando Guldrís, director do Igape. Esta presentación veu seguida dunha reunión de traballo na que participaron representantes dalgunhas das empresas galegas máis destacadas do sector.

Durante o encontro, participaron, de forma mixta – presencial e virtual – representantes de ANFACO, Cafés Candelas, Viña Costeira, Congalsa, Coren, Gupo Calvo, Ceamsa, Gadisa, Galacteum, Hijos de Rivera, Jealsa, Grupo Lence, Larsa, Martín Códax e Vegalsa, entre outros, mostrando o seu interese e compromiso en establecer sinerxías para xerar proxectos tractores capaces de transformar o tecido industrial e o sector alimentario de Galicia.

Programa Next Generation Galicia Food

Os fondos NGEU, que outorgan 750.000 millóns de euros en axudas para materializar o Plan de Recuperación Europeo, animan aos estados e rexións a xerar os mellores proxectos estratéxicos para a súa contorna empresarial, facendo así fronte á crise sanitaria e económica global. Deses fondos, 140.000 millóns están destinados a España, e serán distribuídos en convocatorias competitivas ás que concorrerán os mellores proxectos a nivel estatal.

En particular destaca o Proxecto Estratéxico de Recuperación e Transformación Económica (PERTE) da cadea agroalimentaria intelixente e sustentable, que previsiblemente será aprobado a principios do ano 2022 para o desenvolvemento integrado da cadea de valor. O obxectivo é facilitar o acceso a alimentos sans, seguros e sustentables, que cubran as necesidades da poboación. Para logralo, o PERTE agroalimentario estrutúrase en tres procesos transversais: a trazabilidade e seguridade alimentaria; a sustentabilidade e competitividade e, por último, o desenvolvemento de novas tecnoloxías, servizos e produtos.

Neste contexto e para impulsar a competitividade do sector alimentario galego, Clusaga deseñou o Programa Next Generation Galicia Food, “un gran proxecto integrado e integrador do sector para transformar o tecido empresarial mediante unha transición tecnolóxica, dixital e ecolóxica, baseada na innovación e na xeración de emprego de calidade, e que sirva de mecanismo de ancoraxe duradeira no territorio”, en palabras de Juan José de la Cerda, presidente de Clusaga.

Segundo sinalou o vicepresidente económico, Francisco Conde, Galicia conta cunha “candidatura sólida” para o PERTE, con proxectos que suman un investimento de 1.000 millóns de euros e que poden supor a creación de 4.000 empregos, apuntando que estas iniciativas abranguen toda a cadea de valor da industria agroalimentaria, desde a agricultura, a gandeiría e a pesca, ata a loxística externa e a distribución, incluíndo a transformación, e favorecendo especialmente ás pemes. O obxectivo é consolidar o rural a través dunha verdadeira cohesión social e territorial. “Imos traballar conxuntamente nesta colaboración público-privada que entendemos que é a mellor maneira de utilizar os fondos europeos de cara a futuro”, declarou Francisco Conde.

Para desenvolver este programa, Clusaga e a Xunta de Galicia impulsan esta Oficina Técnica, que levará a cabo a catalización da creación de consorcios e a formulación de proxectos nas distintas convocatorias, maximizando as posibilidades de éxito na captación de fondos. A vixilancia e difusión dos programas do Plan de Recuperación, a identificación de oportunidades e definición de proxectos tractores, ou a asistencia e soporte ás entidades na preparación, tramitación e presentación de propostas, son outras das actividades da oficina.

Situación do sector alimentario en Galicia

O Sector Alimentario de Galicia (SAG) xera un Valor Engadido Bruto (VAB) anual duns 4.070 millóns de euros, o 7,2% do PIB, e 103.000 postos de traballo, o 9,2% do emprego total, e que aínda ten potencial de desenvolvemento e incremento do valor engadido. A industria, pola súa banda, destaca pola evolución positiva dos seus números, chegando a 9.790 millóns de euros e máis de 34.000 empregos no último ano pechado. Entre as máis de 2.500 empresas que a integran, predominan as pemes, das que salienta a súa dispersión como elemento chave da vertebración territorial de Galicia.

Trátase dun sector fundamental para a economía galega, e un dos sectores estratéxicos máis importantes do país, agrupado maioritariamente no Clusaga, co obxectivo de “contribuír ao fortalecemento, potenciación, crecemento sustentable e mellora da competitividade e da internacionalización do mesmo”, segundo indicou o presidente do clúster.

A visión de Clusaga é artellar unha estrutura organizada do sector alimentario galego, integrando ás empresas en procesos de cooperación e establecendo as bases para accións conxuntas que permitan acadar un crecemento significativo e sustentable, dado o seu alto potencial.

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.