“Eólica Así Non” convoca unha nova gran mobilización para o 11D, Día das Montañas, por unha moratoria eólica real efectiva

Con motivo do Día mundial das Montañas, o vindeiro sábado, 11 de decembro, a Coordinadora “Eólica, Así Non” apoiada en máis de 170 colectivos de toda Galiza, convoca á sociedade galega a unha nova grande mobilización fronte a actual invasión eólica

A Coordinadora “Eólica Así Non” escolle esta data polo seu carácter especialmente simbólico na loita social contra a vaga eólica colonial que está a sufrir o país e que discorrerá baixo o lema “Na defensa das montañas. Eólica Así Non”.

En Lugo a concentración será fronte o multiusos da Xunta de Galicia, ás 12h, haberá gaiteirada e poesía reivindicativa, en Becerreá, a concentración será ás 12h na Praza do Concello, en Meira tamén ás 12h na Praza do Concello e en Antas de Ulla ademais da concentración haberá unha andaina que partirá ás 12h da Praza Nova.

Na comarca de Lugo, que atinxe aos concellos de Castroverde, O Corgo, Friol, Outeiro de Rei, Guntín e Lugo, e que lembremos está dentro da Reserva da Biosfera Terras do Miño, son 14 as instalacións eólicas autorizadas ou que xa están en funcionamento, ás que hai que sumar catro máis en tramitación, dúas delas pola Xunta e outras dúas polo MITECO, o que equivale a un total duns 400MW e a máis de 170 de aeroxeneradores, coas correspondentes liñas de evacuación e instalacións asociadas.

En Becerreá e Navia, aínda estando dentro da Reserva da Biosfera Os Ancares Lucenses e Montes de Navia, Cervantes e Becerreá, están proxectados 7 parques ( 6 no concello de Becerreá), promovidos por Enel e Greenalia principalmente. Supoñen unha potencia anual de 270MW. A comarca, con unha poboación en caída libre, veriase abastecida con 3 aeroxeneradores dos mencionados. Reclamamos alternativas reais para umha comarca especialmente castigada polas administracións durante décadas. De levar-se a cabo o proxectados, seria um desastre que hipotecaria para sempre o futuro da comarca.

Na Comarca da Ulloa, a situacion é similar, hai actualmente tres parques eólicos en tramitación, un total de 94,5MW e 22 aeroxeneradores, aos que hai que sumar os parques eólicos xa existentes chegando aos máis de 180MW e 93 aeroxeneradores das instalacións eólicas proxectadas na zona.

Na Comarca de Meira, os novos parques eólicos en tramitación afectarán significativamente e comprometerán a continuidade da actividade agrícola da zona, estando unha gran parte dos novos aeroxeneradores e liñas de evacuacións, proxectados sobre parcelas de uso agrario.

As montañas, as máis prexudicadas pola actual vaga eólica

As montañas galegas son as principais vítimas desta aloucada e caótica vaga eólica que estamos a vivir ao constituír os lugares preferentes polas promotaoras para colocar os seus megaproxectos eólicos, despoxándoas practicamente de todos os seus valores e funcións de carácter ambiental, paisaxístico, cultural e socioeconómico para pasaren a ser meros polígonos industriais ao servizo exclusivo do oligopolio eléctrico.

Os máis de 300 proxectos de enerxía eólica que se atopan actualmente en tramitación no país, xunto coas súas liñas de evacuación e outras infraestruturas asociadas, que se suman aos 186 proxectos xa en funcionamento, terían un impacto singular e irreparable no conxunto de montañas, picos, petoutos, cumios, cordilleiras, serras, macizos, montes e outros tipos de elevacións naturais nos que se prevén implantar, incluso, poñendo en risco a supervivencia do rural galego e o equilibrio ecolóxico do país.

A rede de montañas galega abastece a meirande parte da demanda de auga e alimentos do país e está conformada por verdadeiros santuarios de biodiversidade, que aínda preservan endemismos e hábitats de especial interese para a súa conservación na loita contra o quecemento global, como poden ser as brañas, lagoas, bosques húmidos, turbeiras…. Tamén son o refuxio de especies de flora e fauna singulares, dos grandes mamíferos ameazados ou en perigo de extinción, de aves, morcegos e outras especies que son garante do equilibro ecolóxico de Galiza. As montañas tamén representan as nascentes dos ríos e regos dos que nos abastecemos de auga, ofrecendo o 80% dos recursos hídricos que consumimos, e proporcionando outros múltiples e variados servizos ecosistémicos como o control da erosión do solo, a regulación atmosférica, a paisaxe, reservorio do noso patrimonio cultural, etc. Polo tanto, a actual vaga eólica estaría poñendo nun risco extremo a preservación duns ecosistemas, os de montaña, que son fundamentais para a vida.

Na Galiza, caracterizada por unha grande dispersión poboacional e unha forte identidade rural, as montañas son tamén fogar e medio de vida dunha boa parte da poboación galega, a miúdo esquecida e especialmente indefensa ante o asoballamento das empresas especuladoras da enerxía que ademais contan coa conivencia das administracións públicas.

Así mesmo estes máis de 300 proxectos de enerxía eólica afectan directamente a centos de explotacións gandeiras e agrícolas por todo o país, ocupando a súa superficie agraria útil e forzando en moitos casos a buscar saidas alternativas ou directamente pechar.

Por unha moratoria inmediata e real fronte a falsa moratoria do PP

Desde o primeiro chamamento social masivo que se fixo en Galiza por unha moratoria eólica, que se evidenciou na marcha reivindicativa do pasado 5 de xuño en Santiago de Compostela, nin a Administración galega nin a estatal fixeron nada para frear esta vaga incesante de proxectos eólicos en tramitación, contribuíndo coa súa indiferencia a favorecer aínda máis unha ameaza sen precedentes contra o noso territorio. Hoxe en día, xa son máis 300 os megaproxectos eólicos que están en tramitación, e que en total proxectan 10.000MW de potencia, o que equivalería ao 43% do obxectivo en potencia eólica para o 2030 en todo o Estado español. Lembramos ademais, que Galiza exporta máis do 30% da electricidade que produce.

Por tanto, o vindeiro 11 de decembro, a Coordinadora “Eólica Así Non” retomará as reclamas, máis vixentes que nunca, xa expresadas o pasado 5 de xuño na Praza do Obradoiro de Compostela a través do manifesto “Eólica Así Non”. Volveremos facer fincapé na necesidade cada vez máis urxente de paralizar todos os proxectos eólicos que están en tramitación, tanto na Xunta como no Estado, ata que non se derroguen o desfasado Plan Sectorial Eólico de Galiza e as “Leis de depredación” (Lei de fomento de implantación de iniciativas empresariais e Lei de simplificación administrativa), e se deseñe, de forma participada, outra planificación eólica máis xusta coa sociedade galega, o noso rural e a contorna ambiental. Doutro xeito, estamos deixando en mans do oligopolio eléctrico o futuro do noso territorio.

Ao tempo, queremos deixar claro que a mal chamada “moratoria eólica” anunciada polo goberno de Alberto Núñez Feijóo non dá resposta a ningunha das nosas reclamas. Pola contra, promove a confusión na opinión pública e pretende desmobilizar a sociedade crítica coa actual invasión eólica. Desde “Eólica Así Non” denunciamos a falsidade e inefectividade desta medida anunciada polo goberno galego por canto só afectaría aos proxectos que inicien a súa tramitación no ano 2022 (e con excepcións), pero non tería eficacia sobre ningún dos máis de 300 proxectos eólicos que xa están en tramitación. Ademais, do mesmo xeito que aconteceu coa moratoria do eucalipto, a falsa moratoria eólica do PP podería estar provocando un efecto chamada, e animando as promotoras a iniciar a tramitación dun maior número de proxectos antes de que remate o ano.

Lembramos que os colectivos e entidades que conforman “Eólica, Así Non” estamos a favor das enerxías renovables, necesarias para afrontar o reto climático, pero rexeitamos de raíz o actual modelo enerxético e a forma na que se está a concibir a implantación da enerxía eólica. Por iso, alén dunha moratoria real e eficaz dos proxectos en tramitación, apelamos tamén ao deseño dun modelo enerxético alternativo que se fundamente na soberanía enerxética, no fomento do aforro e da eficiencia enerxética, no autoconsumo e na xestión pública do recurso ao servizo da sociedade galega.

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.