O BNG propón no Parlamento que a Xunta dote a Alu Ibérica dun plan industrial coa participación das administracións centrais e galega

A situación da planta coruñesa de Alu Ibérica é moi delicada após o administrador xudicial ter solicitado na Audiencia o preconcurso de acredores, ben como a autorización para negociar un ERTE para todo o cadro de persoal

Tan delicada é que no horizonte estaría o fechamento definitivo da fábrica e, por tanto, a perda de 300 empregos industriais na comarca da Coruña.

Así as cousas, o BNG vai defender este xoves no Parlamento galego (Comisión de Industria, a partir das 16 horas) unha proposición non de lei visando que a Xunta promova un plan industrial que garanta a continuidade da factoría e, por tanto, que impida que un novo fechamento veña agravar a desindustrialización que sofren a nosa cidade e comarca.

Un plan industrial en que, no mínimo de xeito temporal, deberían participar a administración central e a galega “mentres o proxecto gaña estabilidade”, defenden as parlamentares autoras desta iniciativa, Mercedes Queixas, Ramón Fernández Mon e Daniel Pérez López.

Para ir avante, a Xunta tería de procurar “socios industriais solventes e competitivos” e tería de contar “cun provedor de enerxía que garanta un prezo competitivo e estábel”.

Alu Ibérica non chega á situación na que está por casualidade. A xuízo do BNG, chega por unha mestura de “comportamento empresarial delituoso” e por “unha tolerancia gobernativa imposíbel de xustificar”.

Tolerancia gobernativa do Executivo central, mais tamén dun goberno galego que “parece asistir na distancia como simple observador, botando balóns fóra e renunciando a exercer as súas competencias (exclusivas en política industrial), no que representa unha dimisión de feito das súas responsabilidades de goberno”, afirman os parlamentares do BNG.

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.