Preestrea nacional no Teatro Colón de “Valentina”, nominada á Mellor Película de Animación dos Goya 2022
O Teatro Colón proxectará mañá, ás 12 da mañá, a película de animación «Valentina», obra dirixida por Chelo Loureiro. Trátase da preestrea do filme, que emitirase na Coruña por primeira vez en España, e que que chegará aos cines do país o vindeiro día 10
Haberá unha única sesión, ás 12 da mañá, con entrada de balde ata completar aforo. «Valentina» é unha historia musical sobre a diversidade e a inclusión. A obra conta cunha nominación aos Premios Goya do 2022 na categoría de Mellor Película de Animación.
Ademais da dirección, Chelo Loureiro é tamén a responsable do guión e da produción. A banda sonora está asinada por Nani García e o deseño de personaxes e fondos corre a cargo de David Pintor.
A proxección de «Valentina» enmárcase na estratexia impulsada polo Goberno de Inés Rey de converter o Colón tamén nunha sala de estreas no ámbito audiovisual.
