Renovado o firme dos accesos ás instalacións de Cruz Vermella en Lugo

O delegado territorial, Javier Arias, destaca que o Goberno galego “segue a traballar na mellora das infraestruturas desta zona da cidade”

A Consellería de Infraestruturas e Mobilidade está a mellorar os accesos desde a estrada LU-530 ás instalacións que ten Cruz Vermella no entorno da Ponte Vella do Rato, en Lugo.

O delegado territorial da Xunta, Javier Arias, comprobou hoxe o inicio das obras, que consisten no reforzo do firme mediante unha nova capa de rodaxe de mestura asfáltica en quente.

Os traballos afectan a un traxecto de 95 metros de lonxitude que formaba parte do antigo trazado da estrada que conecta Lugo coa Fonsagrada. A Axencia Galega de Infraestruturas (AXI) inviste arredor de 7.000 euros na actuación, que prevé rematar esta mesma semana.

Arias afirmou que con esta intervención “mellórase notablemente o pavimento e as condicións de acceso á sede da Cruz Vermella e tamén a negocios, parcelas e vivendas situadas neste barrio”.

O delegado lembrou que esta obra dálle continuidade á executada hai poucos meses pola Xunta nesta mesma contorna, onde xa se acondicionou recentemente o acceso á Ponte Vella do Rato, unha actuación moi demandada pola asociación de veciños de Castelo-Rato-A Chanca.

“Deste xeito o Goberno galego segue traballando na mellora das infraestruturas desta zona da cidade”, concluíu Arias, quen destacou que a Consellería de Infraestruturas e Mobilidade destinou 300.700 euros a acondicionar hai dous anos a travesía de San Eufrasio, unha treito que destaca pola súa elevada intensidade de tráfico.

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.