Un broche de Copa para as ‘Guerreiras Laranxas’

O Pescados Rubén Burela FS porá o broche a un 2021 ateigado de éxitos deportivos con desafío de Copa Galicia. As Guerreiras Laranxas desprázanse hoxe á pista do Ourense Envialia (Os Remedios, 20.30 horas) para disputar o encontro de ida das semifinais da 15ª edición irmandiña; as da Mariña gañaron o billete tras impoñerse a Viaxes Amarelle (0-6) e as ourensás fixeron o propio ante Mosteiro Bembrive (2-4)

Tras o triunfo na liga 3-2 en Vista Alegre (xornada 3), o Pescados Rubén Burela FS volverá verse as caras cun rival que conseguiu encadear unha excelente traxectoria. Dende a súa visita á Mariña as ourensás conseguiron os 18 puntos cos que ocupan a 8ª praza, nunha racha que só puido truncar o Futsi (8-4, xornada 9).

Os protagonistas da outra semifinal, Cidade das Burgas e Poio Pescamar, medirán as súas forzas no mesmo escenario, tamén mañá, as 18.00 horas.

Con esta cita, as pupilas de Lucas recibirán o ansiado e merecido descanso de Nadal, tras a esixencia dun mes que abriron conquistando o título europeo na Futsal Women’s European Champions de Lugo con 6-0 ante o Pescara italiano. Volverán ao traballo o luns 3 para preparar a segunda eliminatoria de Copa da Raíña, o sábado 8 na pista de Universidad de Alicante.

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.