Goberno local e Marea Atlántica comezan esta semana o traballo cara a un Plan municipal polo dereito á vivenda

O 26 de xaneiro terá lugar a primeira xuntanza con entidades que traballan polo dereito á vivenda, na que participarán Juan Díaz Villoslada, concelleiro de Urbanismo, Yoya Neira, de Benestar Social, María García e Iago Martínez, voceira e vicevoceiro da Marea

O Goberno local e a Marea Atlántica convocan este mércores a primeira xuntanza dunha Mesa Social, á que están convidadas diversas entidades que traballan no eido do senfogarismo e o dereito á vivenda. Trátase do inicio dunha serie de encontros para dialogar co tecido asociativo e elaborar un Plan municipal polo dereito á vivenda 2022-2026.

A cita será ás 11.30 horas, no Centro Cívico dos Mallos, e contará coa participación do concelleiro de Urbanismo e Mobilidade, Juan Díaz Villoslada; da concelleira de Benestar Social, Yoya Neira; e da voceira e vicevoceiro municipais da Marea Atlántica, María García e Iago Martínez.

Esta iniciativa forma parte do Acordo para o impulso de medidas polo dereito á vivenda, asinado polo Goberno municipal e o grupo da Marea Atlántica o pasado 29 de decembro, e que suporá dedicar máis de nove millóns de euros a políticas de vivenda no orzamento de 2022, no marco das negociacións que manteñen para aprobalos.

Entre outras cuestións, comprométense 3,6 millóns de euros para construír vivenda pública en solo municipal e 2 millóns para comprar soares e inmobles destinados ao alugueiro social, así como un incremento do 30% na bolsa de alugueiro social de EMVSA, e unha suba do 20% nas axudas á rehabilitación de vivendas e edificios.

No pacto asinado reclámanse ademais os necesarios compromisos da Xunta de Galicia e o Estado, administracións con maiores competencias. O dereito á vivenda debe entenderse como eixe das políticas urbanas, por ser indispensable para unha vida digna.

Por iso o acordo inclúe o compromiso de elaborar entre o Goberno local e a Marea Atlántica un Plan municipal polo dereito á vivenda 2022-2026, que coordine todas as políticas neste eido. E que debe comezar por dialogar e escoitar os axentes sociais da cidade, para recibir as súas achegas e ter en conta a experiencia de quen trata día a día cos problemas para acceder a un teito. A Mesa Social que se realiza este 26 de xaneiro será o primeiro destes encontros.

Cómpre lembrar que na Coruña existen máis de 20.000 vivendas baleiras, namentres que os alugueiros subiron un 18% de media entre 2017 e 2021. É necesaria implicación de todas as administracións públicas para afrontar un problema complexo. E así o está a facer o Concello, froito do diálogo aberto entre a Marea Atlántica e o PSOE.

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.