Rubén Arroxo: “No primeiro trimestre de 2022 avanzaremos na renovación das Gándaras con actuacións en 7 novas rúas”
O Goberno de Lugo realizará distintas intervencións en rúas e beirarrúas das Gándaras
O Tenente Alcalde do Concello de Lugo, Rubén Arroxo, anunciou que durante o primeiro trimestre de 2022 comezarán novos traballos de renovación en 7 rúas das Gándaras. Arroxo explicou que «no 2021 renovamos o asfaltado de 15 rúas do barrio e nos primeiros meses deste ano continuaremos a mellora da zona con sete novas intervencións».
O Goberno de Lugo actuará no firme das rúas Ferradura, Ouriol, Garza e no Camiño das Regas e Pista da Fervedoira, ademais de renovar 400 metros de beirarrúa na Calzada das Gándaras e mellorar o firme de Rúa Tras do Colexio .
«Continuamos a traballar na mellora dos barrios da cidade e das zonas periurbanas, mellorando a calidade de vida das veciñas e veciños que a diario utilizan estas rúas», afirmou Arroxo, que engadiu «con esta intervención completamos os traballos iniciados o ano pasado, rematando a renovación integral da zona das Gándaras».
