Xunta e gandeiros instan ao Goberno a reunirse coa plataforma que convocou o paro do transporte

O Goberno galego fai un novo chamamento á Administración central para que identifique corredores seguros para facilitar a chegada de cereais ás industrias de pensos, a chegada dos pensos ás explotacións gandeiras e a saída do leite das granxas, dos produtos lácteos das industrias e da carne dos matadoiros

O conselleiro do Medio Rural, José González, acompañado do director xeral de Gandaría, Agricultura e Industrias Agroalimentarias, José Balseiros, mantivo esta mañá un encontro con gandeiros de Mazaricos e da súa contorna para coñecer a súa situación ante o paro do transporte, tendo en conta que este é o municipio de maior produción láctea de Galicia. Alí, José González e os propios gandeiros solicitáronlle ao Goberno central que se reúna canto antes coa plataforma que convocou o paro para desbloquear esta situación, que pode facer que colapse a cadea agroalimentaria galega.

Así, o conselleiro sinalou que a situación en Galicia pode tornarse dramática debido ao paro do transporte, que agravou aínda máis os problemas que viña sufrindo o eido gandeiro. Neste senso, José González lembrou que o sector estaba xa moi afectado pola suba das materias primas en 2021, situación que se agravou pola invasión rusa a Ucraína e, agora, polo paro do transporte. Por iso, o titular de Medio Rural úrxelle ao ministro de Agricultura, Pesca y Alimentación a que se cumpra a Lei da Cadea Alimentaria e exixe que se faga efectiva a prohibición de venda a perdas. Así mesmo, o conselleiro instoulle, unha vez máis, ao Ministerio a que se reúna inmediatamente coa distribución, coa industria e coa gandaría para, canto antes, acordar unha suba do prezo dos produtos que están percibindo os nosos gandeiros.

Ademais, namentres non se solvente esta situación de desabastecemento, desde a Xunta pedíuselle ao Goberno central que habilite corredores seguros para todo o sector primario galego e se facilite a chegada de materias primas ás industrias de pensos, a chegada dos pensos ás explotacións gandeiras e a saída do leite das granxas, a saída de produtos lácteos das industrias e dos produtos cárnicos dos matadoiros. Así, José González insistiu en que a situación é de extrema gravidade -tal e como trasladan todos os elos da cadea alimentaria- xa que se está a falar de produtos perecedoiros e da supervivencia e benestar dos animais, que está poñendo o sector en risco de parálise.

Ao tempo, José González insistiu na necesidade de levar a cabo outras actuacións, como a inmediata baixada de impostos dos carburantes e outros insumos claves para o sector primario. Unhas demandas, insistiu, que se reflectiron no día de onte nunha manifestación multitudinaria celebrada en Madrid a prol do rural.

Paquete de medidas da Xunta

Namentres o Goberno central se digna a actuar, a Xunta aprobou a pasada semana un paquete de medidas para paliar as consecuencias da alza de prezos e para achegar liquidez ás empresas no ámbito das competencias autonómicas.

Nesta liña, a Xunta asumiu o compromiso de financiar o anticipo das axudas directas da PAC, que as explotacións cobran no mes de outubro de cada ano. Así, trasladou o conselleiro, o Goberno galego anticipará seis meses uns 200 millóns de euros de liquidez para os agricultores e gandeiros, subvencionando os xuros.

Doutra banda, contémplase a apertura de liñas de crédito de ata 20.000 euros para poder atender compras de circulante, por parte dos gandeiros, avaladas pola Xunta. Para esta operación, a Consellería do Medio Rural dispón dunha liña de avais para chegar ata os 25 millóns de euros de préstamos.

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.