A Deputación financia 71.033 horas de servizo de axuda no fogar nos concellos da comarca da Coruña
Valentín González Formoso destaca que a Deputación reforzou todos os seus programas sociais e financia hoxe 100.000 horas máis de axuda no fogar que hai dous anos
A Deputación da Coruña publica hoxe no Boletín Oficial da Provincia (BOP) a concesión definitiva do Programa de Servizos Sociais Comunitarios 2022, que suporá un importante investimento de 8,3 millóns de euros para financiar a contratación de 177 profesionais do ámbito social e un total de 386.823 horas de servizo de axuda no fogar nos municipios de menos de 20.000 habitantes da provincia.
Nos concellos da comarca da Coruña a Deputación financiará este ano cun investimento de preto de 1,7 millóns de euros a contratación de 42 profesionais e un total de 71.033 horas de de axuda no fogar, “un servizo imprescidible para a atención de maiores e dependentes, especialmente nos concellos rurais, que ademais dá emprego a máis dun centenar de personas na provincia”, segundo explicou o presidente da Deputación, Valentín González Formoso.
“Seguimos a cumprir co noso compromiso de reforzar todos os programas de protección social, tanto os da Deputación como os que dan apoio aos municipios da provincia”, afirmou o presidente provincial, que destacou que “a Deputación financia hoxe na provincia 100.000 horas máis de servizo de axuda no fogar na provincia que hai dous anos”.
Formoso subliñou o gran esforzo que teñen que facer os pequenos concellos para poder contar cunha plantilla de profesionais especialistas no eido social. “Por este motivo seguimos incrementando a dotación económica deste programa, un dos piares da Área Social da Deputación, permitindo que os concellos podan contratar máis persoal administrativo, técnico e de axuda a domicilio”, incidiu.
“Os profesionais que a Deputación axuda a contratar son os que buscan solucións aos problemas diarios das persoas máis desfavorecidas ou que atravesan situacións difíciles, os que atenden nas casas aos maiores e dependentes”, explicou González Formoso, que destacou que moitos municipios viron incrementada a carga de traballo do seus servizos sociais nos últimos dous anos debido á pandemia e á situación socioeconómica.
Estes profesionais atenden cada día a miles de cidadáns con problemas de índole social, que con frecuencia pertencen a colectivos especialmente vulnerables: infancia, mulleres vítimas de violencia, persoas con especiais dificultades de inserción laboral, maiores sen recursos, persoas sen fogar ou con discapacidade.
O orzamento dedicado ao Programa de Servizos Sociais Comunitarios incrementouse durante o mandato de Valentín González Formoso de 4 a 8,3 millóns de euros.
| COMARCA DA CORUÑA | |||
| ABEGONDO | 4 | 4.895,00 | 150.740,00 € |
| ARANGA | 2 | 4.700,00 | 100.400,00 € |
| BERGONDO | 2 | 6.000,00 | 112.000,00 € |
| BETANZOS | 4 | 4.940,00 | 143.280,00 € |
| CARRAL | 3 | 12.600,00 | 209.200,00 € |
| COIRÓS | 2 | 3.204,00 | 78.448,00 € |
| CURTIS | 2 | 2.400,00 | 68.800,00 € |
| IRIXOA | 2 | 2.900,00 | 74.800,00 € |
| MESÍA | 2 | 4.392,00 | 92.180,20 € |
| MIÑO | 4 | 1.790,00 | 105.080,00 € |
| OZA – CESURAS | 3 | 4.688,36 | 114.260,32 € |
| PADERNE | 2 | 2.000,00 | 59.000,00 € |
| SADA | 5 | 8.756,00 | 189.072,00 € |
| SOBRADO DOS MONXES | 3 | 5.000,00 | 111.000,00 € |
| VILASANTAR | 2 | 2.768,00 | 73.216,00 € |
| TOTAL COMARCA | 42 | 71.033,36 | 1.681.476,52 € |
| Profesionais sociais contratados | Horas de Axuda no Fogar | Investimento da Deputación | |
