A Xunta destaca a importancia de traballar na prevención e tratamento das adiccións en menores para fomentar a inclusión social

O delegado territorial da Xunta en Lugo e o director xeral de Familia, Infancia e Dinamización Demográfica, Jacobo Rey, participaron na apertura das xornadas sobre Menores e adiccións organizadas por Alar Galicia

O delegado territorial da Xunta en Lugo, Javier Arias, salientou hoxe durante a inauguración das xornadas sobre Menores e adiccións organizadas por Alar Galicia que o Goberno galego «impulsa programas transversais nos que están involucradas diferentes Consellerías para fomentar a sensibilización, a prevención e a inclusión social dos colectivos con dificultades á hora de desenvolver unha vida normalizada».

Nese sentido, referiuse a diferentes iniciativas nas que a Xunta colabora con entidades como Alar, entre as que destacou o programa de coaching a menores; as axudas para a contratación de mozos para a realización de servizos de interese social; as medidas de intervención integral con menores agresores de violencia de xénero e os plans dirixidos a mulleres vítimas de violencia de xénero.

«Aínda que queda moito por facer estamos avanzando polo bo camiño», dixo o delegado, quen puxo como exemplo «a importante actualización normativa que estamos a levar adiante en Galicia, onde o ano pasado modificamos a lei de prevención da violencia de xénero, incorporando a violencia dixital como outra forma de violencia de xénero».

Prevención e intervención

Pola súa banda, o director xeral de Familia, Infancia e Dinamización Demográfica, Jacobo Rey, asegurou durante a súa intervención na mesa redonda que leva o mesmo título das xornadas que, ante os novos retos que están xurdindo a raíz do uso de internet e das TICs, sumadas ás adiccións a substancias (como o alcol, o tabaco ou as drogas), son fundamentais o labor de control, de prevención e de intervención.

Neste sentido, as limitacións xogan un papel chave á hora de evitar a introdución dos menores nas adiccións; do mesmo xeito que a prevención, que se leva a cabo principalmente nos ámbitos sanitario, educativo e social; e a intervención. Jacobo Rey incidiu de xeito especial na responsabilidade que teñen as familias á hora de levar a cabo estes tres procesos, xa que «a Administración por si soa non vai solucionar» un problema tan complexo e con tantas arestas. «A familia», asegurou, «é o piar fundamental» sobre o que se asenta o comportamento dos menores, ao servir de modelo para os fillos, tal como demostran diferentes estudos. Por iso, é importante dotar á contorna familiar de ferramentas para facer fronte a este reto.

As xornadas desenvólvense na Delegación Territorial da Xunta e continúan mañá e o venres. Inclúen seis mesas redondas e intervirán ata 17 relatores entre os que figuran psiquiatras, psicólogos e expertos en saúde mental, así como policías e economistas. Entre outros, participará o xuíz José Antonio Vázquez Taín.

 

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.