FEGADACE e o Hospital Comarcal de Valdeorras inauguran hoxe, no Día da Saúde, a exposición ‘Punto e seguido’

A información sobre o dano cerebral adquirido chega ao Hospital Comarcal de Valdeorras pola man da colaboración entre a Área Sanitaria de Ourense, Verín e O Barco e a Federación Galega de Dano Cerebral (FEGADACE). Unha das principais liñas de actuación da Federación é a información e sensibilización, cos obxectivos de dar a coñecer a realidade das persoas con dano cerebral, pero tamén de axudar a previr esta discapacidade, que afecta a máis de 35.000 persoas en Galicia.

Así, a información chega a través da apertura da exposición ‘Punto e seguido. A vida despois do dano cerebral adquirido’ coincidindo co Día Mundial da Saúde. O Hospital do Barco e FEGADACE escollemos esta data pola importancia que ten o coidado da saúde e a promoción duns hábitos saudables para previr o dano cerebral adquirido.

A mostra poderá verse desde hoxe ata o día 18 de abril, en horario ininterrompido, como o do centro hospitalario.

As fotografías que compoñen a mostra, obra do fotógrafo compostelán Aigi Boga, realizáronse nas cinco asociacións que forman parte da Federación. Nas imaxes, protagonizadas polas persoas usuarias de ADACECO, ADACE Lugo, Alento, Renacer e Sarela, amósase a súa vida cotiá, as actividades que realizan ou a súa convivencia, é dicir, a vida despois do “punto e seguido” tras un ictus, un traumatismo cranioencefálico, ou calquera outra das causas do dano cerebral adquirido.

Ademais, para acompañar a exposición, FEGADACE realizou unha serie de vídeos curtos que contan con diferentes testemuños de persoas con dano cerebral, familiares e profesionais das entidades. Son un total de sete vídeos, cunha peza principal e seis máis pequenas, que crean un retrato da complexidade de secuelas que compoñen o dano cerebral: físicas, sensoriais, económicas, cognitivas, sociais, orgánicas, etc.

Día Mundial da Saúde

A xornada mundial da Saúde foi promulgada pola Organización das Nacións Unidas (ONU) para conmemorar a data de fundación da Organización Mundial da Saúde (OMS). Cada ano, a OMS selecciona un tema ao que dedica o día mundial (este ano é a ‘O noso planeta, a nosa saúde’), e aproveita para sensibilizar sobre diferentes aspectos do coidado da saúde, o benestar público, a prevención de doenzas ou o respecto aos dereitos das persoas que as teñen.

FEGADACE aproveita a data para sensibilizar sobre a prevención do dano cerebral adquirido, unha discapacidade que se pode traballar para evitar a través duns hábitos saudables que reduzan o risco de ictus, a principal causa, no 78% dos casos, do dano cerebral. O ictus ten unha serie de factores de risco, como a obesidade, a diabetes, o sedentarismo ou o tabaquismo, sobre os que se pode intervir mediante hábitos de vida saudable e controis médicos axeitados.

‘Punto e seguido’ en Verín

Trala súa exhibición no Barco de Valdeorras, a mostra ‘Punto e seguido’ viaxa a Verín, onde tamén se poderá visitar no Hospital Comarcal. Esta exposición tamén é froito da colaboración entre FEGADACE a Xerencia ourensá do Sergas. ‘Punto e seguido’ estará en Verín do 18 ao 27 de abril.

A organización destas actividades conta coa colaboración da Xerencia da Área Sanitaria e co financiamento da Consellería de Política Social, dentro dos programas con cargo á asignación tributaria do 0,7% do IRPF; é dicir, grazas ás persoas que marcan a X Solidaria na súa declaración da renda.

 

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.