O BNG levará ao pleno dos orzamentos unha proposta de avaliación e revisión da reordenación do tráfico en Celanova

 O BNG de Celanova conseguiu o compromiso do PP no pleno da corporación municipal celebrado o pasado mércores día 6 de levar a seguinte sesión, previsiblemente o pleno extraordinario dos orzamentos, o debate sobre o malestar da maioría dos comerciantes e de parte da veciñanza coa medida de reorganización do tráfico imposta polo goberno local sen consulta previa ningunha, nin coa veciñanza nin cos grupos políticos que a representan.

O BNG de Celanova alcanza este acordo despois de que o PP rexeitase nun primeiro momento, en febreiro pasado, a proposta nacionalista de convocar un pleno extraordinario. Daquela, despois de visitar e reunirse con comerciantes da vila, o BNG urxiu a necesidade de levar o debate social ás institucións, mais o PP reaccionou cun proposta extemporánea de moción de censura.

Agora, sete semanas despois, o PP accedeu no pleno do mércores a votar a favor da proposta nacionalista, que aprobou finalmente, para tratar «a posibilidade de modificar a reordenación do tráfico rodado no centro de Celanova», segundo figura no texto. Ao mesmo tempo, Leopoldo Rodríguez votou a favor dunha proposta dos populares para esixir a redacción dun plan de mobilidade, introducindo emendas para concretar o acordo, e que o plan contemple a totalidade do «casco urbano».

As nacionalistas esperan que o alcalde convoque o pleno dos orzamentos, antes do pleno ordinario de finais de maio, para coordinar co PP a mellor maneira de facer efectivo o acordo alcanzado e levar, por fin, o debate á institución municipal.

ORZAMENTOS

En canto a proposta de orzamentos que desde a Alcaldía se remitiu ao BNG de Celanova en marzo, a asemblea nacionalista local abordou o asunto e considerou que os orzamentos presentados volven a ser un documento para tramitar salarios e subvencións a entidades, sen perspectiva estratéxica ningunha e cunha partida de investimentos ridícula, onde se ofrece a posibilidade de modificar o destino de apenas cen mil euros, dos que case a metade pretenden gastalos en cubrir os colectores do lixo.

O BNG transmitiu á concelleira responsábel a súa decepción coas contas, e lembroulle que durante os dous anos e dez meses que o goberno local leva a cargo do Concello, non aceptou ningunha das propostas de intervencións nin a corto nin a longo prazo impulsadas (e aprobadas en pleno) polas nacionalistas. Neste momento, a postura do BNG é rexeitar eses orzamentos.

Entre estas propostas que teñen que ver coa actividade comercial están, entre outras: a redución ou supresión temporal de taxas do lixo, da auga e do imposto de circulación, e a creación dun fondo de axudas para autónomos, rebaixa o IBI para os próximos dous anos (xuño 2020), a creación dun banco municipal de locais comerciais baleiros para ofertar en réxime de alugueiro (novembro 2020), ou a convocatoria dunha mesa do comercio local (decembro 2020).

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.