Vilalba premia as mellores tapas con Queixo San Simón da Costa

Tanto a cidadanía como o xurado profesional deron a súa opinión sobre as mellores tapas creativas e tradicionais

Vilalba acolleu onte pola tarde o acto de entrega dos premios do Concurso de Tapas con Queixo San Simón da Costa, no que participaban un total de 22 establecementos.

A tenente de alcaldesa e concelleira de Comercio, Marta Rouco, e Manuel Silvosa, da Asociación de Empresarios Sete Pontes, fixeron entrega dos premios aos establecementos gañadores, así como aos consumidores que gañaron o sorteo tras completar a “Ruta do tapeo”.

O certame, impulsado pola Asociación de Empresarios do Polígono Sete Pontes coa colaboración do Concello de Vilalba, propoñía crear unha tapa na que o Queixo San Simón da Costa fose o ingrediente principal.

O concurso tivo en conta, en primeiro lugar, o reconto de votos do público. Deste modo, a cidadanía, que probou as diferentes tapas dos locais, determinou como mellor tapa creativa á proposta do Hostal O Cristo. O premio do público á mellor tapa tradicional recibiuno a Casa Maragata.

Os oito establecementos que recibiron unha maior puntuación por parte da cidadanía, liderados por estes dous restaurantes, pasaron á fase final do concurso. Nesta etapa, un xurado profesional decidiu as mellores propostas deste ano, premiando como mellor tapa creativa á proposta de O Parador e como mellor tapa tradicional á preparación de As Xaquinas.

O xurado estaba formado por dous profesionais da cociña pertencentes á Asociación Provincial de Hostaleiros de Lugo, Jesús Pereiro e Martín Mantilla. Acompañounos no xurado Cristina Román, como representante da Asociación de Queixeiros, da queixería Don Gabino.

Por último, o público tamén podía participar no sorteo de varios agasallos se degustaban as propostas de 5 dos establecementos participantes. Deste modo, os gañadores deste sorteo foron Paz Domínguez Bodelón, Marcos Pardeiro Prieto e Aldara Villarino Villarino, quen recibiron un lote de produtos locais.

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.