Agradecemento do CW Pontevedra a Escola Naval Militar de Marín

Este martes 10 de maio ás 12:00 celebrouse nas dependencias da Escola Naval Militar de Marín un breve acto de agradecemento por parte do CW Pontevedra a dita institución, representada polo seu actual Comandante-Director D. Pedro Cardona Suanzes, en recoñecemento polo permanente compromiso e inestimable colaboración co club que teñen mantido sempre que se solicitou o seu apoio.

Así, a Escola Naval Militar de Marín ten sido o escenario nos últimos anos de numerosos eventos e competicións deportivas tanto de ámbito autonómico como estatal, destacando a celebración en xuño de 2019 do Campionato de España Xuvenil de 2ª Categoría, no cal o club pontevedrés conseguiu un histórico terceiro posto e o seu xogador Alejandro Andión foi nomeado “Mellor xogador” do Campionato.

Tras o levantamento das restricións derivadas da pandemia da Covid-19 estes dous últimos anos, durante a actual temporada 2021-22, o CW Pontevedra retomou o interese en seguir contando cunha instalación icónica como é a piscina da Escola Naval Militar de Marín para celebrar novas competicións alí, recibindo novamente todo tipo de facilidades e a total predisposición por parte da dirección da instalación para tal fin.

O ata agora último episodio desa colaboración produciuse este pasado sábado 7 de maio, no que a Escola Naval Militar de Marín volveu ser escenario dun novo fito histórico na vida do Club, acollendo o partido de ida da eliminatoria de ascenso a primeira categoría nacional do equipo absoluto feminino que o CW Pontevedra disputou ante o CW Murcia e que podería significar que por primeira vez na historia do wáter-polo galego un club tivera representación nunha liga regular de categoría nacional. O resultado deportivo, cun marcador de 20-2 foi amplamente satisfactorio, pero tamén foi especialmente destacable o gran ambiente e colorido dunha ateigada grada, onde os siareiros tanto do CW Murcia desprazados a Pontevedra como os do conxunto local desfrutaron dunha grande tarde de wáter-polo.

Por outro lado, compre recordar tamén que o peche do Complexo Deportivo de Rías do Sur a principios de marzo de 2022, supuxo un novo revés para o desenvolvemento normal da actividade diaria non só do CW Pontevedra, senón tamén de outros clubs acuáticos da cidade como o Galaico Sincro e o Club Natación Galaico. E unha vez máis, e coa colaboración e mediación da FEGAN, a Escola Naval Militar de Marín brindou desde o primeiro momento a súa colaboración e abriu as súas portas para tratar de paliar na medida do posible a problemática da falta de espazo para poder desenvolver os adestramentos diarios de cada unha de ditas disciplinas.

Por todo elo, e como forma de facer público o noso máis sincero agradecemento á Escola Naval Militar de Marín, desde a Xunta Directiva do CW Pontevedra creemos que é necesario e xusto ter este pequeno xesto como símbolo da nosa gratitude cara unha institución á que xa consideramos como a nosa segunda casa e sempre está presente nos momentos máis importantes da historia do noso club.

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.