Aprobada unha iniciativa para impulsar a fibra óptica nas vivendas de Constantín en Baralla

O Voceiro Socialista, Jaime González tamén defendeu outra moción, aprobada por unanimidade, para declarar o concello de Baralla Libre de LGTBIfobia

O Voceiro Socialista, Jaime González avanzou hoxe que defendeu unha iniciativa que foi aprobada, na pasada sesión plenaria celebrada este xoves día 26, para solicitar a instalación de fibra óptica nas vivendas de Constantín que non contan con ela.

Nesa liña lembra que o Goberno de Pedro Sánchez impulsa, “dentro do Plan de Recuperación, Transformación e Resiliencia, un investimento de 1.367 millóns de euros en 2022 para mellorar a conectividade en España”. Desta cantidade, 631 millóns destinaranse ao desenvolvemento de 5G e 736 millóns, para continuar co despregamento de redes de banda ancha de alta capacidade. “Polo tanto estamos diante oportunidade única para a implantación da fibra no noso concello, ademais de converterse nunha oportunidade para impulsar proxectos competitivos ante a transformación dixital da economía local”, dixo González.

Nesta mesma sesión plenaria, o Grupo Socialista presentou outra proposta, aprobada por unanimidade, para apoiar as campañas relacionadas coa visibilidade e apoio ó colectivo LGTBI. “Unha das medidas mais inmediatas coa aprobación desta moción é declarar o concello de Baralla como Libre de LGTBIfobia. Dende tódolos recunchos, dende tódolos concellos pequenos ou grandes debemos reclamar á Xunta que se cumpra coa Lei e se constitúan os servizos municipais de mediación e información LGTBI”, insistiu o socialista.

Jaime Gonzalez sinala que a través desta proposta, “queremos restaurar e potenciar o respaldo institucional cara este colectivo”. Ademais hai que lembrar que tamén “presentamos un rogo para poñer a bandeira LGTBI o vindeiro 28 de xuño na casa do Concello, coincidindo co día do Orgullo LGBT. Xa que o que Concello non colocou a bandeira o pasado 17 maio, tal e como o solicitamos formalmente”, advirte.

Por último argumentou “dende o PSdeG entendemos que esta declaración é un paso moi importante para contribuír a facer de Baralla un concello moderno, solidario, aberto, plural e diverso, e sobretodo un concello que non consinte nin ampara unha soa agresión de homofobia ou de calquera índole”, resumiu Jaime Gonzalez.

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.