O Alcalde de Laracha recibe a bandeira do sendeiro de saldoiro de Caión outorgada por ADEAC

O itinerario que recibe o galardón é o tramo do paseo marítimo entre a praza Eduardo Vila Fano e o arroio Figueirido.

O alcalde, José Manuel López Varela, e o tenente alcalde, José Ramón Martínez Barbeito, recolleron hoxe a Bandeira Sendeiro Azul para o Sendeiro de Saldoiro. Este distintivo é outorgado pola Asociación de Educación Ambiental e do Consumidor (Adeac) para recoñecer o papel das sendas e camiños de acceso ás praias como valiosos recursos para a interpretación ambiental, o desfrute da natureza e a realización de actividades deportivas e de ocio ao aire libre.

O acto desenvolveuse no Real Jardín Botánico de Madrid. En representación da Xunta de Galicia, contouse coa presenza de Belén do Campo, a directora xeral de Patrimonio Cultural, así como de alcaldes doutros municipios galegos galardoados.

O Sendeiro de Saldoiro, no que ondeará a Bandeira Sendeiro Azul este verán, obtén o recoñecemento por noveno ano consecutivo. É o tramo do paseo marítimo de Caión de 1,5 quilómetros de distancia que vai desde a praza Eduardo Vila Fano ata o arroio Figueirido.

En toda España hai 86 Sendeiros Azuis, dos cales 29 son itinerarios galegos pertencentes a 19 concellos diferentes, seis deles na provincia da Coruña.

Ademais deste recoñecemento, Adeac tamén outorgou ao Concello da Laracha a Bandeira Azul para a praia de Caión e o distintivo de Centro Azul para o Centro de Interpretación dos Muíños de Auga da Costa da Morte de Golmar.

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.