“O sucedido este domingo no partido de fútbol é indigno dun representante público”, sinalan dende o PP de Pol

“O sucedido este domingo no partido de fútbol é indigno dun representante público”. Así o indican os populares de Pol ao abeiro dos feitos acontecidos esta fin de semana e que incluíron, supostamente, a agresión por parte do alcalde deste municipio a un siareiro do Portomarín.

Neste senso, consideran que o rexedor debe pedir desculpas publicamente, pois “a imaxe do noso pobo quedou moi danada”. Asemade, dende a formación popular, e “ante a gravidade do sucedido”, afirman que o socialista debería “porse a un lado”. “Por dignidade política e persoal, o alcalde debería deixar as súas funcións como tal”, polo menos, sinalan, ata que se esclareza o caso e se diriman responsabilidades.

A ética do PSOE

Os populares pregúntanse así “onde está á ética que tanto defende o Partido Socialista”. “Que pensan o secretario provincial e o autonómico, é dicir, o Sr. Tomé e o Sr. Formoso, sobre o sucedido?. Dende logo, moi positivo non é ter a un alcalde que, no pasado, xa foi noticia a nivel nacional pola súa saída de ton na Deputación contra un deputado provincial, e agora sexa o autor, supostamente, dunha agresión a un afeccionado”.

Con todo, dende o PP agardan que este suceso non volva a repetirse, “pois a ningún veciño nos gusta que Pol volva a saír nos medios de comunicación polas malas formas e continuas faltas de respecto do alcalde que temos”.

 

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.